कैलालीमा चुनावी गतिवधि बढाउँदै दलहरु

धनगढी । स्थानीय निर्वाचनको मिति नजिकिँदै गर्दा कैलालीमा सक्रिय राजनीतिक दलहरु चुनाव केन्द्रीत अभियानलाई तीव्र बनाएका छन् । बिशेषगरी नेपाली कांग्रेस, नेकपा एमाले र माओवदी केन्द्रले चुनावी अभियानमा जुटेका हुन् । उनीहरसँगै अन्य दलले पनि आफ्ना गतिविधि जारी राखेको जनाएका छन् । दलहरुले चुनावी परिणामा आफ्नो पार्न आकर्षक नारा समेत तय गरेका छन् ।

नेकपा माओवादी केन्द्रले ‘सम्बृद्ध गाउँनगर, सम्बृद्ध नेपालको आधार’ भन्ने नारा अघि सारेको छ । माओवादी केन्द्रले मंगलबारै कैलालीका विभिन्न वडा तथा नगरमा पुगेर स्थानीय निर्वाचनको उद्देश्य र महत्वका बारेमा छलफल चलाएको छ । स्थानीय निर्वाचनमा माओवादी केन्द्रको जीतले मात्र पिछडिएका वर्ग, आदिवासी, जनजाती, मुस्लिम, दलित, थारुको मुद्धा र अधिकारको संरक्षण हुने सो पार्टीका नेता रमेश धामीले बताए ।

धामीले धनगढी उपमहानगरपालिकाका १९ वटै वडाका वडा अध्यक्षसँग वडाको बस्तुस्थिती र जित्ने आधारका बारेमाराय सुझाव लिएको र त्यहि सुझावका आधारमा अघि बढ्ने बताए ।
उनले नेकपा माओवादी केन्द्रले बुथ केन्द्रको निर्धारण, बुथको घोषणा र पार्टीको घोषणापत्र वडा लगेर गाउँपालिकाहरुमा प्रचारप्रसारको अभियान तीब्र बनाएको अखिल क्रान्तिकारीका केन्द्रिय सदस्य रमेश भट्टराईले जानकारी दिए ।

त्यसैगरी नेपाली काँग्रेसले पनि चुनावी अभियान अन्तर्गत विभिन्न गाउँबस्तीमा भेटघाटलाई तिब्रता दिन थालेको छ । नेपाली काँग्रेस कैलालीले जिल्लाका गाउँपालिका र नगरपालिका अन्तर्गत वडाहरुमा पुगेर वडा भेला आयोजना गर्न लागेको नेपाली काँग्रेस कैलालीका सचिव पूर्ण कुवँरले बताए ।

उता, नेकपा एमालेले पनि वडा कमिटी गठन गर्दै चुनावी प्रचार अभियानलाई अघि बढाएको नेकपा एमाले कैलालीका जिल्ला सचिव रणबहादुर चन्दले जानकारी दिए । राप्रपाले पनि जिल्लामा चुनावी अभियान सम्बन्धी गतिविधि अघि बढाएको सो पार्टीले जनाएको छ ।