महिला उपप्रमुखमै सीमित

तेह्रथुम । आसन्न स्थानीय तहको निर्वाचनमा प्रमुख र उपप्रमुखमध्ये एक पदमा महिलालाई उम्मेदवार बनाउनैपर्ने बाध्यकारी व्यवस्था भए पनि राजनीतिक दलहरूले महिलालाई दोस्रो तह अर्थात् उपप्रमुखमा मात्रै सीमित गर्ने देखिएको छ । ठूला दलहरूले महिलाको नाम प्रमुख पदमा चर्चामा समेत नल्याएका कारण यस्तो अवस्था आएको हो । समीकरणको तयारीमा रहेका दलहरूले पनि महिलालाई प्रमुखको उम्मेदवार बनाउने संकेत गरेका छैनन् ।

उम्मेदवारी घोषणा गरिसकेको नेकपा मालेले जिल्लाका ६ वटै स्थानीय तहको प्रमुखमा पुरुषको मात्रै नाम घोषणा गरेको छ । उपप्रमुखका उम्मेदवार भने अझै घोषणा गरिएको छैन । मालेलाई महिला उम्मेदवार बनाउन हम्मेहम्मे परेको बताइँदै छ । दलहरूले महिलाको नेतृत्व विकास गराउन चासो नदिँदा निर्वाचनमा महिला उम्मेदवारको कम चर्चा भएको अधिकारकर्मीहरूले बताएका छन् । आजको नयाँ पत्रिकामा खबर छ ।

यस्तै, उम्मेदवार चयनको तयारी गरिरहेका कांग्रेस, एमाले र माओवादी केन्द्रले पनि नगरपालिकाको मेयर वा गाउँपालिकाको अध्यक्षमा महिलालाई अवसर दिने सम्भावना देखिएको छैन । प्रमुख पदमा महिलाको उम्मेदवारी दिए पनि हार्ने स्थानमा मात्र दिने तयारी ती दलको छ । ती दलबाट उपप्रमुख पदमा समेत महिला आकांक्षीको त्यति ठूलो चर्चा छैन । तर, महिलालाई उम्मेदवार बनाउनैपर्ने बाध्यकारी अवस्थाले भने दलहरू सकसमा परेका छन् ।

जिल्लामा म्याङलुङ र लालीगुराँस गरी दुई नगरपालिका र आठराई, फेदाप, मेन्छ्यायेम र छथर गरी चार गाउँपालिका रहेका छन् । ती सबै स्थानीय तहमा कांग्रेसले प्रमुख पदमा पुरुषकै नाम चर्चामा ल्याएको छ । कांग्रेसबाट उपप्रमुखमा समेत महिलाको नाम त्यति धेरै आएको छैन ।

कांग्रेस–माओवादी र अन्य साना दलको समीकरण बन्ने हल्लाले पनि महिला उम्मेदवारको चर्चा नभएको नेताहरू बताउँछन् । प्रमुख प्रतिपक्षी एमालेबाट पनि प्रमुख पदमा पुरुषकै नाम चर्चामा अगाडि छ । सबै स्थानीय तहमा एकल उम्मेदवारी दिने तयारी गरेको एमालेले उपप्रमुखमा भने महिलालाई नै उम्मेदवार बनाउने तयारी गरेको जनाएको छ ।

माओवादी केन्द्र समीकरण भएमा महिलालाई प्रमुख पदमै उम्मेदवार बनाएर भए पनि उपप्रमुखमा पुरुषको उम्मेदवारी दिने र जित निकाल्ने तयारीमा देखिन्छ । तर, एकल उम्मेदवारी दिनुपर्ने अवस्था आएमा भने माओवादीबाट पनि त्यस्तो सम्भावना कम छ । समीकरण भएमा महिलालाई हार्ने गरी उम्मेदवार बनाउने हल्लाले महिला नेतृहरू त्रसित भएका छन् ।

मालेले गर्‍यो उम्मेदवार घोषणा
तेह्रथुम – नेकपा मालेले तेह्रथुमका ६ वटै स्थानीय तहको प्रमुख पदमा उम्मेदवारी घोषणा गरेको छ । पार्टीका जिल्ला सचिव यमनाथ दाहालले एक प्रेस विज्ञप्ति जारी गर्दै जिल्लाका ६ वटै स्थानीय तहको निर्वाचनमा प्रमुख पदका उम्मेदवारको घोषणा गरेका हुन् ।

नेकपा मालेले म्याङलुङ नगरपालिकाको मेयर पदमा डिल्ली बुढाथोकी र लालीगुराँस नगरपालिकाको मेयरमा छत्रबहादुर लिम्बूलाई उठाएको छ । त्यसैगरी, मालेले मेन्छ्यायेम गाउँपालिकाको प्रमुखमा थानेश्वर घिमिरे, छथर गाउँपालिका प्रमुखमा माधव दाहाल, फेदाप गाउँपालिकाको प्रमुखमा भक्त रेग्मी र आठराई गाउँपालिका प्रमुखमा कमल सिटौलालाई चयन गरेको छ । यस्तै, मालेले ६ वटै स्थानीय तहका उपप्रमुख र वडाध्यक्षको समेत छिटै उम्मेदवारी घोषणा गर्ने बताएको छ । जिल्लाका अन्य ठूला दलले भने उम्मेदवारी घोषणा गरेका छैनन् ।