सडक बालकलाई स्याहार्न खोज्दा निरमायाले गुमाईन् ३ लाख

सड्कमा वेवारिसे अवस्थामा भेटिएको बालकलाई उद्धार गरेर लालन–पालन गर्न खोज्दा काठमाडौंको गोठाटारकी निरमाया ढुंगेलले अनाहकमा ३ लाख ३७ हजार गुमाएकी छिन् ।

काठमाडौंको कागेश्वरी मनहरा नगरपालिका–८ गोठाटार बस्ने निरमायाले चार दिनअघी बाटोमा बेवारिसे अवस्थामा फेला परेको १५ बर्षिय बालकलाई घरमा लगेकी थिईन् । स्याहार सुसार गरेर पढाउने उद्देश्यले घर लगेपनी गोपाल केसी नाम बताउने बालकले उल्टै घरमा कोही नभएको अवस्थामा निरमायाको धनमाल चोरेर फरार भएको प्रहरीले जनाएको छ ।
महानगरीय प्रहरी परिसर काठमाडौंका अनुसार केसीले नगद २ लाख र सुनको सिक्री २ तोला समेत गरि करिब ३ लाख ३७ हजार रुपैयाँ बराबरको धनमाल चोरेर फरार भएका छन् । उनको खोजी भईरहेको छ ।

यसैबिच, ललितपुर महानगरपालिका–१४ ताल्चीखेलस्थित डेरा गरी बस्ने ओखलढुङ्गा उबु–२ घर भएकी सिता कुमारी राईको कोठाबाट बुधबार कोही नभएको अवस्थामा करीब ४ लाख रुपैयाँ बराबरको सुनका गहना चोरी भएको छ ।

त्यस्तै ललितपुर महानगरपालिका हरिसिद्धी स्थित राजेश विष्टको घरबाट बुधबार कोही नभएको अवस्थामा सुनचाँदीका गहना र नगद समेत गरी १ लाख ५१ हजार रुपैयाँ बराबरको धनमाल चोरी भएको छ ।