गृहमन्त्री शर्माको स्पष्टीकरण- ‘मन्त्रालयकै अधिकार प्रयोग गरी कर्मचारीको सरुवा तथा बढुवा’

गृहमन्त्री जनार्दन शर्माले मन्त्रालयको अधिकार प्रयोग गरी कर्मचारीको सरुवा तथा बढुवा गरेको स्पष्ट  पारेका छन् ।

प्रमुख प्रतिपक्षी दल एमालेले सरकारले विद्यमान नियम कानून मिचेर मनपरी कर्मचारी सरुवा गरेको भन्दै त्यसबारे सरकारको जवाफ मागेपछि मन्त्री शर्माले त्यस बारे शुक्रबारको बैठकमा सदनलाई जानकारी गराएका हुन् ।

उनले प्रहरीको बढुवा उच्च अधिकारीले दिएको नम्बर र सिफारिसका आधारमा र मन्त्रालयको अधिकार प्रयोग गरी कर्मचारी सरुवा गरेको भन्दै सरकार विधि, प्रक्रिया र पद्धति अनुसार अघि बढेको दाबी गरे ।

गृहमन्त्री शर्माले बारबार उठिरहने र छलफल भइरहने कर्मचारी सरुवा तथा बढुवाको विषयको दिर्घकालीन समाधानका लागि संघीय प्रहरी ऐन अन्तिम चरणमा पुर्‍याएको तथा स्थानीय प्रशासन ऐन मार्फत प्रशासन सम्बन्धी सबै समस्या सम्बोधन गर्ने गरी तयारी भइरहेको जानकारी गराए।

गत सोमबारको संसद बैठकमा प्रमुख प्रतिपक्षी दल नेकपा एमालेले प्रधानमन्त्रीको भारत भ्रमणमा संविधान संशोधनका बारेमा दिएको अभिव्यक्ति, ग्यास तथा पेट्रोल पाईपलाईन विच्छाउने, पश्चेश्वर आयोजनाको डिपीआर निर्माणका लागि नेपाली टोली भारत पठाएको, कर्मचारी सरुवा तथा आयल नियमको जग्गा खरीदमा भएको भ्रष्टाचारबारे सरकारको जवाफ माग गरेको थियो ।