प्रजातन्त्र भनेको निर्वाचनहरुको आयोजनामात्र हो भन्ने भ्रम राखिनु हुन्न : पूर्वराजा
प्रकाशित मिति : आइतवार, फाल्गुन ६, २०७४
काठमाडौं, फागुन ६ । पूर्वराजा ज्ञानेन्द्र शाहले प्रजातन्त्र भनेको निर्वाचनहरुको आयोजनामात्र हो भन्ने भ्रम राखिन नहुने बताएका छन् ।
६८ औं प्रजातन्त्र दिवसका अवसरमा शुभकामना सन्देश जारी गर्दै पूर्वराजाले सीमित व्यक्तिहरुको स्वार्थ रक्षालाई नै प्रजातन्त्रको रुपमा जनताले आत्मसात् गर्नुपरेको भन्दै नेताहरुलाई सचेत गराएका छन् ।
पूर्वराजा शाहले शुभकामना सन्देशमा राजनीतिक परिवर्तनको एक दशकमा मुलुक र जनहितको विषय अस्तव्यस्त बनेको भन्दै समीक्षा गर्ने समय आएको बताएका छन् ।
‘२०६३ साल वैशाख ११ गते हामीमा निहीत राजकीय सत्ताको प्रयोग गरी भएको राजनीतिक परिवर्तनपछिको दशकमा देश र जनताका हितप्रति संवेदनशील एवं जिम्मेवार व्यवहार प्रस्तुत भइरहेको छ या अझै केन्द्रित सोचको पासोमा देशको राजनीति अल्झिएको छ, त्यसको समीक्षाको समय आएको,’ उनले सन्देशमा भनेका छन् ।
देशको राष्ट्रियता, राष्ट्रिय एकता र सार्वभौमिकतालाई सबल तुल्याउँदै जनताको सर्वोपरि हितलाई केन्द्रमा राखेर व्यवहार गर्ने व्यवस्थामात्र प्रजातान्त्रिक हुन सक्ने उनको भनाइ छ ।
उनले प्रजातन्त्रलाई संस्थागत गर्ने क्रममा कुनै पनि राजनीतिक सम्झौता, सहमति या समझदारीमा देशको गौरब बढाउने विषयले प्राथमिकता किन पाएन भन्दै प्रश्नसमेत गरेका छन् ।
पूर्वराजाले प्रजातन्त्रमा सबैले सम्मानित महसुस गर्छन् भन्ने विश्वव्यापी मान्यता र विश्वास रहेकामा सचेतसमेत गराएका छन् ।
प्रतिकृया दिनुहोस
सम्बन्धित समाचार
