निर्वाचन आयोगको कार्यालय कान्तिपथमा एक विशेष कार्यक्रमको आयोजना गरि दोस्रो निर्वाचन दिवस मनाइएको हो। कार्यक्रममा राष्ट्रपति विद्या भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, प्रधानन्यायाधिश गोपालप्रसाद पराजुली, संवैधानिक निकायका प्रमुखहरु, नेपालस्थित कूटनीतिक नियोगका प्रमुखहरुलगायतको उल्लेख्य सहभागिता रहेको थियो।
कार्यक्रमलाई सम्बोधन गर्दै प्रधानमन्त्री ओलीले निर्वाचनलाई अझै स्वच्छ, स्वतन्त्र र विश्वसनीय बनाउन निर्वाचन दिवसले महत्वपूर्ण योगदान दिने विश्वास व्यक्त गरे।
उनले तीन वटै तहको निर्वाचन सम्पन्न गरेर निर्वाचन आयोगले महत्वपूर्ण संवैधानिक दायित्व सफलतापूर्वक सम्पन्न गराएको भन्दै धन्यवाद दिए। त्यस अवसरमा प्रधानमन्त्री ओलीले निर्वाचनपछि मुलुकमा राजनीतिक संक्रमणकालको अन्त्य भएको उल्लेख गर्दै जनताको जीवनस्तर माथि उठाउने अभियानमा सबैलाई परिचालित हुन पनि आह्वान गरे।
उनले समावेशी आर्थिक रुपान्तरणको माध्यामबाट मुलुकलाई समृद्ध बनाउन सबैले सहयोग गर्नुपर्नेमा पनि जोड दिए।
प्रधानमन्त्री ओलीले सुखी नेपालीः समृद्ध नेपाल बनाउनु सरकारको मुख्य कार्यभार भएको पनि उल्लेख गरे। कार्यक्रममा बोल्दै प्रमुख निर्वाचन आयुक्त डा. अयोधिप्रसाद यादवले एक वर्ष भित्रै ३ वटै तहको निर्वाचन सम्पन्न गराएर आयोगले नयाँ कीर्तिमान कायम गरेको दावी गरे। उनले संवैधानिक व्यवस्था अनुसार सबै तहको निर्वाचन सम्पन्न गराउन राजनीतिक दलहरुले महत्वपूर्ण सहयोग गरेको स्मरण समेत गराए।
निर्वाचन आयोगले गत वर्षदेखि निर्वाचन दिवस मनाउन सुरू गरेको हो ।
