कालंगा जलविद्युत् आयोजना निर्माणको काम धमाधम

बझाङ, फागुन ९ । बझाङको बुंगल क्षेत्रमा पर्ने कालंगा जलविद्युत् आयोजना निर्माणको कामले तीव्रता पाएको छ ।

निजी क्षेत्रको सबैभन्दा धेरै लगानी रहेको यो आयोजनाको काम ३० प्रतिशत सम्पन्न भइसकेको छ । आयोजना निर्माणमा १० ओटा बैंक र केही व्यापारीको लगानी छ ।

वि.सं. २०६५ सालदेखि सम्भाव्यता अध्ययन सुरु भएको आयोजनाको निर्माणका लागि तीनओटा बैंकहरुसँग ऋण लगानी सम्झौता सम्पन्न भइसकेपछि आयोजनाको निर्माणकार्य सुरु भएको हो ।

आयोजनाले निमार्णका लागि आवश्यक पर्ने २०० रोपनी जग्गा खरिद गरिसकेको छ भने आयोजना निमार्णका लागि सडक निर्माणका साथै फराकिलो बनाउने कामसमेत सम्पन्न भइसकेको जनाएको छ ।

अहिले टनेल निमार्णको कामसँगै ३० प्रतिशत काम सम्पन्न भइसकेको आयोजनाले जनाएको छ ।

झन्डै १३ सय करोड रुपैयाँकोे लागत अनुमान गरिएको यस आयोजनाबाट ७५ मेगावाट विद्युत् उत्पादन हुनेछ ।

यो आयोजना निजी क्षेत्रले निर्माण गर्न लागेको प्रदेश नम्बर–७ को सबैभन्दा ठूलो आयोजना भएको कालंगा हाइड्रो प्रालिका अध्यक्ष उमेश श्रेष्ठले बताए ।

वि.सं. २०७७ असोज ३ गतेभित्र आयोजना सम्पन्न गर्ने लक्ष्य रहेको छ । हाइड्रोपावरको १० प्रतिशत सेयर स्थानीयका लागि छुट्याइएको हाइड्रोका संस्थापक वीरेन्द्र मल्ल बताउँछन् ।

अबको चार वर्षपछि बझाङको कायापलट हुने र यसमा आफूहरु जस्तोसुकै सहयोग गर्न तयार रहेको बुंगल नगरपालिकाका मेयर धनबहादुर विष्ट बताउँछन् ।

आयोजना सुरु भएसँगै स्थानीयसमेत उत्साहित बनेका छन् ।

सानीगाड हाइड्रो प्रालिले प्रबद्र्घन गर्न लागेको यो आयोजनाको तीन ठाउँमा संरचना निर्माण भएको छ । ३८.४६ मेगावाटभन्दा बढी दहबगरमा इनटेक बनेर खिरातडीको बिजगडमा पावरहाउस बन्नेछ । अहिले सुरुङ खन्ने काम पनि तीव्ररुपमा भइरहेको छ ।

आयोजनामा स्थानीय तथा अरु जिल्लाका गरी दुई हजारभन्दा बढीले रोजगारीसमेत पाएका छन् ।