“प्रदेश सरकारले जनमुखी कार्यक्रम ल्याउँछ “- मुख्यमन्त्री राई

झापा, फागुन २१ । प्रदेश नम्बर–१ का मुख्यमन्त्री शेरधन राईले विकास, समृद्धि र सम्पन्नताका लागि राजनीतिक नेतृत्वको अर्जुनदृष्टि हुने बताएका छन् ।

सोमबार झापा र इलामको सीमावर्ती सुखानीमा आयोजित कार्यक्रममा बोल्दै उनले सो कुरा बताएका हुन् ।

मुख्यमन्त्री भएपछि पहिलोपटक सुखानी आएका राईले सहिद भूमिलाई नमुना बनाउने प्रदेश सरकारको लक्ष्य रहेको बताए ।

उनले सहिदका सपना पूरा हुने दिन आएको भन्दै त्यसका लागि प्रदेश सरकारले जनमुखी कार्यक्रम ल्याउने उल्लेख गरे ।

सीमित स्रोत र साधनको परिचालन गरेर भएपनि प्रदेश–१ लाई उत्कृष्ट बनाउने उनको दाबी छ ।

तत्कालीन सत्ताले वि.सं. २०२९ सालमा गोली हानेर मारेका कम्युनिष्ट योद्धाहरु रामनाथ दाहाल, नेत्र घिमिरे, कृष्ण कुइँकेल, वीरेन राजवंशी र नारायण श्रेष्ठको स्मृतिमा भएको कार्यक्रम नेकपा एमाले र नेकपा माओवादी केन्द्रले संयुक्तरुपमा आयोजना गरेका हुन् ।