दुर्घटनामा दुईजनाको मृत्यु

लहान, चैत १२ । पूर्व–पश्चिम राजमार्गअन्तर्गत् सप्तरीको सुरुंगा नगरपालिका–५, कुसाहामा भएको दुर्घटनामा परी दुईजनाको मृत्यु भएको छ भने एकजना गम्भीर घाइते भएका छन् ।

मृत्यु हुनेमा मोटरसाइकल चालक सिरहाको सुखीपुर नगरपालिका–४, महादेवका ३५ वर्षीय राजीवकुमार चौधरी र साइकलयात्री सुरुंगा नगरपालिका–८ का ३० वर्षीय महेश ठाकुर रहेको प्रहरीले जनाएको छ ।

पूर्वबाट पश्चिमतर्फ जाँदै गरेको स९प १९७७ नम्बरको मोटरसाइकलले आइतबार राति साइकललाई ठक्कर दिएको थियो ।

चौधरी र ठाकुरको लहानस्थित डिभाइन अस्पतालमा उपचारकाक्रममा मृत्यु भएको इलाका प्रहरी कार्यालय कडरबोनाले जनाएको छ ।

मोटरसाइकलमा पछाडि सवार सप्तरी, बोदेबर्साइन नगरपालिका–८ का ३० वर्षीय भुनेश्वर चौधरी गम्भीर घाइते भएका छन् । उनको विराटनगरस्थित न्यूरो अस्पतालमा उपचार भइरहेको छ । रासस