विस्फोटक पदार्थ पड्केर बालक गम्भीर घाइते

उदयपुरको त्रियुगा नगरपालिका–१३ स्थित थरुहट रंगशाला क्षेत्रमा बुधबार दिउँसो अज्ञात व्यक्तिले झोलामा छाडेको विस्फोटक पदार्थ पड्केर स्थानीयवासी १४ वर्षीय बालक पारस राई गम्भीर घाइते भएका छन् ।

जिल्ला प्रहरी कार्यालय उदयपुरकाअनुसार घाइते बालकको जिल्ला अस्पताल उदयपुरमा उपचार हुन नसकेपछि सुनसरी, धरानस्थित बीपी मेमोरियल अस्पताल पठाइएको छ ।

थरुहट रंगशालानजिकै हवाई फिल्डको चौरमा भैंसीका पाडा चराउँदै गरेका बालकले झोलामा कालो वस्तु देखेको र त्यो हेर्न खोज्दा विस्फोट भएको जिल्ला प्रहरी कार्यालय उदयपुरका प्रहरी निरीक्षक मानप्रसाद श्रेष्ठले बताए ।

विस्फोटबाट घाइते बनेका बालकको पेटमा बमको छर्रा लागेको र टाउकोमासमेत चोट लागेका कारण जिल्ला अस्पताल उदयपुरमा उपचार हुन नसकी धरान पठाइएको प्रहरी निरीक्षक श्रेष्ठले बताए ।

उक्त बम कसले छाडेको हो भन्नेबारेमा प्रहरीले अनुसन्धान गरिरहेको छ । रासस