बझाङमा खहरे खोलाले बगाउँदा बजारबाट फर्कदैं गरेका ५ जनाको मृत्यु

बझाङ, बैशाख २३ । बझाङको थलारा गाँउपालिका–४ नजिकै रहेको खहरे खोलाले बगाउँदा ५ जनाको मृत्यु भएको छ ।

मृत्यु हुनेमा थलारा गाउँपालिका–४ का २७ बर्षीय हर्क विक, उनकी श्रीमती २६ बर्षीया डल्ली विक, ३५ बर्षीया कलसी विक, १२ बर्षीया मनिसा विक र ३ बर्षीया सक्षम विक रहेको जिल्ला प्रहरी कार्यालयले जनाएको छ ।

स्थानीय बजार ढोड्यखेतबाट घर फर्कने क्रममा गाँउ नजिकै रहेकोे गुह्या खोलाले बगाउँदा उनीहरुको मृत्यु भएको हो ।

शनिबार राती करीब ८ बजे तिर परेको अविरल बर्षाका कारण खहरे खोलामा आएको बाढीले उनीहरुलाई बगाएको प्रहरीको भनाई छ ।

स्थानीय बासीन्दाका अनुसार हर्क विककी श्रीमतीसहित २ वालबालिका गरी एकै परिवारका ४ जनाको ज्यान गएको जनाईएको छ ।

यता जिल्ला प्रहरी कार्यलयले भने घटना स्थलमा प्रहरी पुगी सकेको र रिपोर्ट लिने काम भई रहेको जनाएको छ । घटनाका बारेमा प्रहरीले स्थलगत अनुसन्धान गरीरहेको छ ।

अबिरल बर्षाका कारण १९ गते जयपृथ्वी राजमार्ग अन्र्तगत पर्ने जयपृथ्वी नगरपालिका–७ मा समेत खहरे खोलाले से १ ज ८२० नम्बरको जीप बगाउँदा ३ जनाको मृत्यु भएको थियो ।