लोकतन्त्रविरुद्धको कुनै पनि क्रियाकलाप सह्य नहुने प्रधानमन्त्रीको चेतावनी

काठमाडौं, फागुन ७ । प्रधानमन्त्री केपी शर्मा ओलीले लोकतन्त्रविरुद्धको कुनै पनि क्रियाकलाप सह्य नहुने चेतावनी दिएका छन् ।

६९ औं प्रजातन्त्र दिवसको अवसरमा सरकारले काठमाडौंको टुंडिखेलमा आयोजना गरेको कार्यक्रमलाई सम्बोधन गर्दैै प्रधानमन्त्री ओलीले लोकतन्त्रविरुद्धका कुनै पनि कुरालाई छुट नदिइने बताए । देशको काँचुली फेर्ने अठोटका साथ अघि बढ्दै गर्दा नकारात्मक प्रवृत्ति पनि प्रतिबिम्वित भएको भन्दै उनले लोकतन्त्रिक प्रकृयामा अवरोध सिर्जना गर्ने, विकास–निर्माणमा बाधा हाल्ने, वैदेशिक लगानीकर्तालाई निरुत्साहित पार्नेजस्ता गतिविधिहरु निन्दनीय रहेको बताए ।

राजनीतिक रङमा रंगिएका भए पनि नेपाललाई समृद्ध मुलुकका रुपमा स्थापित हुन नदिने कुनै पनि दुष्प्रयास स्वीकार्य हुन नसक्ने उनको भनाइ थियो । यस्ता गतिविधि गर्नेहरुविरुद्ध सरकार कडाइका साथ प्रस्तुत हुने चेतावनी उनले दिए ।

अधिनायकवादलाई परास्त गर्दै अविकासका विरुद्ध केन्द्रित भएको भन्दै प्रधानमन्त्री ओलीले आर्थिक विकास र सामाजिक न्यायसहितको लोकतन्त्रलाई सुदृढ गर्ने दिशामा अग्रसर रहेको बताए । सन् २०२२ सम्ममा नेपाललाई अति कम विकसित मुलुकको स्तरबाट स्तरोन्नति गर्ने र सन् २०३० भित्र दिगो विकास लक्ष्यहरु हासिल गर्न सरकार प्रतिबद्ध रहेको उनको भनाइ थियो ।

द्वन्द्व व्यवस्थापन लगभग भइसकेको भन्दै प्रधानमन्त्री ओलीले अन्तर्राष्ट्रिय मञ्चहरुमा नेपालको प्रतिष्ठा बढेको जिकिर गरे ।

कार्यक्रममा राष्ट्रपति विद्यादेवी भण्डारी, उपराष्ट्रपति नन्दबहादुर पुन, सभामुख कृष्णबहादुर महरा लगायत संवैधानिक उच्चपदस्थ अधिकारी, विदेशी कूटनीतिक नियोगका प्रमुखहरुको उपस्थिति थियो ।