संसदीय समितिमा पहिलो पटक देउवा, हाजिर गरे, तर बोलेनन्

काठमाडौ । संसदको संसदीय समितिमा बुधबार पहिलो पटक नेपाली कांग्रेसका संसदीय दलका नेता तथा पूर्व प्रधानमन्त्री शेरबहादुर देउवा उपस्थित भएका छन्। प्रतिनिधि सभाको बिकास तथा प्रविधि समितिमा बुधबार बिहान देउवा अचानक पुगेका थिए।

समितिको बुधबारको ३५ औं बैठकमा पहिलो पटक देउवा देखिएका थिए। समिति सभापति कल्याणीकुमारी खड्काले देउवा पहिलो पटक समितिमा आएर केहीबेर बसेको बताएकी छिन्। हाजिर मात्र गरेर निस्किएका देउवाले बैठकलाई सम्वोधन भने भने गरेनन्

बुधबार बिहान नेपाली कांग्रेसले संसदीय दलको बैठक बोलाइएको थियो । बैठकमा गएका बेला एकैछिन भए पनि समितिमा उपस्थिती जनाएका थिए। राज्य व्यवस्था तथा सुशासन समितिका सदस्य रहेका  पुष्पकमल दाहाल ‘प्रचण्ड’ पनि एकपटक मात्र समितिको बैठकमा उपस्थित भएका थिए।

‘मिनी संसद’ रुपमा चिनिएको संसदीय समितिको बैठकमा प्रायजसो प्रमुख नेताहरु सहभागी हुने गरेका छैनन्। अर्थ समितिका सदस्य पूर्व प्रधानमन्त्री डा. बाबुराम भट्टराई, अन्तर्राष्ट्रिय सम्बन्ध समितिमा सदस्य रहेका पूर्व प्रधानमन्त्री माधबकुमार नेपाल भने प्रायजसो समितिमा उपस्थित हुने गरेका छन्।

जुनसुकै विधेयकमाथि पनि प्रशस्तै छलफल गरिने समितिलाई नेताहरुले आफू व्यस्त हुने गरेको भन्दै वेवास्ता गर्दै आएका छन् । प्रतिनिधिसभामा १०, राष्ट्रियसभामा ४ वटा र २ वटा संयुक्त समिति रहेका छन् । – नेपाल समाचारपत्र