संघीयता कार्यान्वयनमा मिडियाको भूमिका ठूलो छ : प्रदेश प्रमुख यादव

बुटवल । प्रदेश ५ का प्रमुख धर्मनाथ यादवले संघीयता कार्यान्वयनमा मिडियाको भूमिका महत्वपूर्ण रहेको बताएका छन् । यादवले संघीय शासन प्रणालीको व्यवहारिक कार्यान्वयन गर्दै सबैलाई संघीय ढाँचातर्फ अभ्यस्त बनाउने कार्यमा समेत मिडियाको महत्वपूर्ण योगदान पुग्नेमा जोड दिए ।

५९ औं स्थापना दिवसका अवसरमा राष्ट्रिय समाचार समिति प्रदेश नम्बर ५ ले आज बुटवलमा आयोजना गरेको ‘संघीयता कार्यन्वयनमा राससको भूमिका’विषयक अन्तरक्रिया कार्यक्रममा बोल्दै यादवले यस्तो बताएका हुन् ।

राष्ट्रिय एकता र भाईचारा तथा भातृत्व अभिवृद्धिका लागी सन्चारले भूमिका खेल्नुपर्ने भन्दै उनले सूचना र सञ्चार प्रवाहमा समयानुकूल परिवर्तनको जरुरी रहेको समेत बताए । कार्यक्रममा राससका पूर्व अध्यक्ष बालकृष्ण चापागाईले समाचारको सत्यता र तथ्यता आजको आवश्यक्ता भएको बताए । उनले संघीयता कायन्वयनमा राससको भूमिका महत्वपूर्ण भएको उल्लेख गर्दै हरेक स्थानीय तहमा राससका प्रतिनिधि जरुरी रहेको बताए ।

मानवअधिकार तथा शान्ति समाजका वरिष्ठ उपाध्यक्ष गोविन्द खनालले मिडिया जनताको पक्षमा हुनुपर्ने बताए । मानवअधिकार आयोग प्रदेश ५ का उपनिर्देशक पवनकुमार भट्टले मानवीय जीवन शैली र मानवअधिकारको विषयमा मिडियाको भूमिका प्रभावकारी हुनुपर्नेमा जोड दिए ।

कार्यक्रममा रासस प्रदेश कार्यलय बुटवलका प्रमुख भरत के.सी., सैनामैना नगरका उपप्रमुख बिना रानामगरले लगायतले स्थानीय सरकार र मिडियाबीचको सहकार्य अझै प्रभावकारी हुनुपर्नेमा जोड दिए ।