सरकारको विरुद्धमा अनेरास्ववियूको विरोध कार्यक्रम, बालुवाटार घेर्नेदेखि मन्त्रीका कार्यक्रम बहिस्कारसम्म

काठमाडौं । नेकपाको दाहाल नेपाल पक्षको विद्यार्थी संगठन अनेरास्ववियूले प्रतिनिधिसभा विघटनको विरोधमा तेस्रो चरणको आन्दोलनका कार्यक्रम घोषणा गरेको छ ।

अनेरास्ववियूको रञ्जित तामाङ समूहका विद्यार्थीहरुले तेस्रो चरणको आन्दोलनमा बालुवाटार घेराउदेखि मन्त्रीहरुलाई सार्वजनिक बहिस्कार गर्नेसम्मका कार्यक्रम तय गरेका हुन् ।

अनेरास्ववियूले माघ २२ र २३ गते सरकारी नम्बर प्लेटका गाडी चल्न नदिने निर्णयसमेत गरेको छ । अनेरास्ववियूले लिपुलेक, लिम्पियाधुरासहिको नयाँ नक्सा छापिएको पाठ्यपुस्तक सार्वजनिक गरी पढाउनुपर्ने मागसमेत गरेको छ ।

संसद विघटनको विरोधमा अनेरास्ववियूले पहिलो र दोस्रो चरणको आन्दोलनका क्रममा सडक बहस, बयलगाडा र्‍याली, लालटिन जुलुस, व्यंग्यात्मक कार्टुन प्रदर्शनी लगायतका कार्यक्रम गरेको थियो ।