गाडी चढेर बन्द सफल पार्न हिँडे अध्यक्ष दाहाल, सडकमै खाए दालमोठ चिउरा

काठमाडौं । नेपाल कम्युनिष्ट पार्टी नेकपाको दाहाल–माधव समूहले गरेको देशव्यापी आमहड्तालको प्रभाव संघीय राजधानी काठमाडौंमा पनि परेको छ ।

बिहिबार बिहानैदेखि काठमाडौं, ललितपुर र भक्तपुरमा अत्यावश्यक सेवा क्षेत्रका सवारी साधन बाहेक सार्वजनिक यातायातका साधन ठप्प प्राय बनेका छन् । छिटफुट रूपमा मोटरसाइकल र निजी सवारी साधनहरू सञ्चालन भएका छन् ।

चारपाङग्रे सवारी साधन भन्दा दुई पाङग्रे सवारी साधनहरू बढी सञ्चालनमा आएका छन् । खाद्यान्न लगायतका बजार पसल आंशिक खुलेका छन् । बन्द आव्हानकर्ताहरूले बिहानै देखि चोक–चोकमा बसेर बन्द सफल बनाउन प्रर्दशन गर्दै आएका छन् ।

बन्द सफल पार्न भन्दै शीर्ष नेताहरू नै सडकमा ओर्लिएका छन् । नेता पुष्पकमल दाहाल नै सडकमा आउनुभएको थियो । देशव्यापी आमहड्ताल आह्वान गरेका दाहाल आफैँले बन्दको अवज्ञा गर्दै बा १७ च ३० ७१ को ल्याण्ड क्रुजर गाडी चढेर हामहड्ताल गराउन ललितपुरको पुल्चोक पुग्नुभएको थियो ।

गाडीबाट ओर्लिएर दाहाल पुल्चोकको बीचसडकमा केही समय पलेटी कसेर बस्नुभएको थियो । त्यहाँ बसेर उहाँले दालमोठ चिउरा र पानी खानुभएको थियो । त्यसपछि उठेर फेरी गाडी चढेर उहाँ जावलाखेल तर्फ लाग्नुभएको थियो । गाडी चढेर कार्यक्रम स्थल पुगेका नेता दाहाल सडकमा नै बसेर बन्दकर्ताको नेतृत्व गर्नुभएको थियो । उहाँसँगै नेतृ पम्फा भुसाल लगायतका नेता कार्यकर्ताहरु पनि सहभागी थिए ।

बिहानै प्रहरीले कलंकी चोकबाट नेतृ अष्टलक्ष्मी शाक्य सहितका नेता कार्यकर्तालाई नियन्त्रणमा लिएपछि कार्यकर्ताहरूले विभिन्न स्थानबाट जुलुस सहित प्रदर्शन गरेका थिए । चावहिल चोक बाट बिहान प्रहरीले कृष्ण केसी लगायतका नेता कार्यकर्ताहरू नियन्त्रणमा लिएको छ ।

यसै क्रममा प्रहरीले विभिन्न स्थानबाट दर्जनौ बन्द आव्हानकर्ताहरुलाई नियन्त्रणमा लिएको छ । आमहड्ताल सफल बनाउन प्रचण्ड–माधव समूहले काठमाडौंका प्रमुख स्थानका लागि कमाण्डर नै तोकेका थिए ।

युवराज ज्ञवाली र अष्टलक्ष्मी शाक्य कलंकी, बेदुराम भुसाल बल्खु, देव गुरुङ सातदोबाटो, लीलामणि पोखरेल कोटेश्वर, हरिबोल गजुरेल र बर्षमान पुन चावहिल, शक्ति बस्नेत महारागञ्ज, भीम रावल गोंगबु, रघुजी पन्त बालाजु, नारायणकाजी श्रेष्ठ र जनार्दन शर्मा रत्नपार्क र पम्फा भुसाललाई पुल्चोक को कमाण्डरको जिम्मेवारी दिइएको थियो ।