दश खेलाडीमा सिमित ब्राजिल सेमिफाईनलमा, चिली बाहिरीयो

काठमाडौं। घरेलु टोलि ब्राजिल कोपा अमेरिका फुटबलको सेमिफाईनलमा प्रवेश गरेको छ।

स्ट्यनडियो ओलम्पियाकोमा शनिबार बिहान सम्पन्न क्वार्टरफाईनलको दोस्रो खेलमा चिलीलाई १ – ० गोलअन्तरले हराउँदै ब्राजिल सेमिफाइनलमा पुगेको हो।

ब्राजिललाई जित दिलाउन लुकास पाक्वेटाले एक मात्र निर्णाएक गोल गरे।

दोस्रो हाफको सुरुवाती समय ४६ औं मिनेटमा लुकासले गोल गर्दै ब्राजिललाई सुरुवाती अग्रता दिलाएका थिए। दुवै टिमले थप गोल गर्न नसकेपछि उक्त गोल नै निर्णायक बन्न पुग्यो।

४८ औं मिनेटमा ग्याब्रियल जिससले रातो कार्ड पाएपछि ब्राजिल दबावमा आएको थियो। उनले विपक्षी खेलाडीलाई अनावश्यक फउल गरेपछि रेडकार्ड पाएका थिए।

खेलको करिब एक हाफ ब्राजिलले १० खेलाडीमा सिमित भएर खेलेको थियो।

दुवै टिमले गोल गर्ने केही अवसर पाए पनि गोल भने गर्न सकेनन।

चिलीका एडुआर्डो वर्गासले दोस्रो हाफको ६२ औं मिनेटमा गोल गरेका थिए। तर, भीएआर चेक गर्दा अफसाइड पाईएपछि उक्त गोलले मान्यता पाएन।

जितसँगै ब्राजिलले जारी प्रतियोगितामा सेमिफाईनलमा पुग्ने दोस्रो टिम बनेको छ। पहिलो खेलमा पाराग्वेलाई पराजित गर्दै पेरु सेमिफाइनलमा प्रवेश गरिसकेको छ।

अब फाइनल प्रवेशका लागि ब्राजिलले पेरुसँग प्रतिस्प्रधा गर्ने छ। पराजित चिली प्रतियोगिताबाट बाहिरीएको छ।