जर्नेल कार्कीले दिए प्रधानसेनापति शर्माविरुद्ध उजुरी, सेना भित्र खैलाबैला

काठमाडौं – वरिष्ठताका आधारमा आफू अगाडि भए पनि पदावधि थपको सिफारिसमा नपरेको भन्दै नेपाली सेनाका उपरथी अनन्त कार्कीले असन्तुष्टि जाहेर गर्दै प्रधानसेनापति प्रभुराम शर्माविरुद्ध उजुरी दिएका छन् ।

‘चेन अफ कमान्ड’मा रहने फौजी संगठनमा संगठन प्रमुखविरुद्ध राजनीतिक नेतृत्वलाई गुहार्ने घटना कमै हुने भए पनि मुलुकको राष्ट्रिय सेना नेपाली सेनाकै नेतृत्वविरुद्ध यस्तो उजुरी परेको हो ।

उपरथीको पहिलो नम्बरमा रहेका कार्कीले प्रधानसेनापति शर्माविरुद्ध रक्षा मन्त्रालयको समेत जिम्मेवारी सम्हालेका प्रधानमन्त्री शेरबहादुर देउवालाई सम्बोधन गर्दै उजुरी दिएका हुन् । पदावधि थप सिफारिसमा नपरेपछि प्रधानसेनापतिविरुद्ध नै प्रधानमन्त्रीसमक्ष उजुरी

बढुवा र पदावधि थपका विषयमा सैनिक अधिकारीले प्रायः रक्षा मन्त्रालयमा उजुरी दिने गरेको भए पनि उपरथी कार्कीले प्रधानमन्त्रीको सचिवालयमा उजुरी दिनुलाई अर्थपूर्ण रूपमा हेरिएको छ ।

स्रोतका अनुसार प्रधानमन्त्री देउवासँगको पुरानो सम्बन्धका कारण उपरथी कार्कीले प्रधान सेनापतिको सिफारिसविरुद्ध उजुरी दिएका हुन् । शेरबहादुर देउवा विगतमा प्रधानमन्त्री हुँदा उनी केही वर्षअघि एडीसी थिए । त्यही आधारमा उनले प्रधानमन्त्री कार्यालयमा उजुरी दिएको हुन सक्ने स्रोतको दाबी छ ।

उपरथी कार्कीले अन्याय भएपछि आफूले प्रधानमन्त्रीसमक्ष उजुरी दिएको प्रतिक्रिया दिएका छन् । कुनै विकल्प नभएपछि प्रधानमन्त्रीसमक्ष उजुरी दिनु आफ्नो बाध्यता रहेको उनको भनाइ छ ।

उपरथी कार्कीले राष्ट्रपति विद्यादेवी भण्डारी, सभामुख अग्निप्रसाद सापकोटा र राष्ट्रिय सभा अध्यक्ष गणेशप्रसाद तिमिल्सिनालाई पनि उजुरीको बोधार्थ दिएका छन् ।

नेपाली सेनाका तीन उपरथीमध्ये पहिलो नम्बरमा कार्की छन् । दोस्रो र तेस्रोमा क्रमशः सीताराम खड्का र तारा पाण्डे छन् । प्रधानसेनापति शर्माले कार्कीलाई पन्छाएर खड्का र पाण्डेको पदावधि थपको सिफारिस गरेपछि पदावधि थप्ने विषयमा देखिएको विवाद सतहमा आएको हो ।

प्रधानसेनापति शर्माले गत १६ पुसमा खड्का र पाण्डेको पदावधि थपका लागि रक्षा मन्त्रालयमा पत्र पठाएको भए पनि त्यस विषयमा अहिलेसम्म निर्णय भएको छैन ।

प्रधानसेनापति शर्माले पठाएको सिफारिसलाई ३० पुसको मन्त्रिपरिषद् बैठकमा छलफल भएको थियो । तर, वरीयताको कुरा उठेपछि त्यस दिन निर्णय हुन नसकेको स्रोतको दाबी रहेको आजको राजधानी दैनिकमा खवर छ ।