प्रकाशित मिति : सोमवार, जेष्ठ २३, २०७९
काठमाडौं । नेकपा (एकीकृत समाजवादी)ले आफ्नो पार्टीबाट सहभागी भएका मन्त्री फेर्न गरेको प्रस्ताव विवादमा परेपछि प्रधानमन्त्री शेरबहादुर देउवाले त्यसलाई अस्वीकार गरिदिनुभएको छ ।
बजेटको विषयमा संसद्मा छलफल चल्दै गर्दा सम्बन्धित मन्त्रीलाई परिवर्तन गर्नु उचित नहुने भन्दै एकीकृत समाजवादीका मन्त्रीहरूले प्रधानमन्त्री देउवालाई सोमबार भेटेर आग्रह गरेका थिए ।
यस्तै उनीहरूले आइतबार नै माओवादी केन्द्रका अध्यक्ष पुष्पकमल दाहाललाई पनि भेटेर आफ्ना अध्यक्ष माधव नेपाललाई सम्झाइदिन दबाव दिएका थिए ।
एकीकृत समाजवादीका तर्फबाट मन्त्री बनेकाहरूले उठान गरेको विषयमा सोमबार विहान शीर्ष नेताहरूको बैठक बालुवाटारमा बसेको थियो ।
बैठकमा अहिले मन्त्री फेर्दा अन्य दलमा पनि फेरबदलको दबाव बढ्ने र त्यसले सत्ता गठबन्धनको निरन्तरतामै समस्या उत्पन्न हुनसक्ने जोखिमबारे समीक्षा भएको थियो ।
त्यसको असर बजेट पारित गर्ने कार्यमै पर्न सक्ने देखिएपछि तत्कालका लागि मन्त्रिपरिषद् पुनर्गठन नगर्ने निष्कर्षमा प्रधानमन्त्री पुग्नुभएको हो ।
पार्टीको निर्णयपछि मन्त्रीहरूले आपत्ति जनाउँदै प्रधानमन्त्रीलाई निर्णय रोक्न दबाव दिएपछि देउवा पछि हट्नुभएको हो ।
एकीकृत समाजवादीका स्थायी कमिटी सदस्य तथा स्वास्थ्यमन्त्री विरोध खतिवडाले बजेटको विषयमा छलफल चल्दै गर्दा मन्त्री हेरफेर अन्तराष्ट्रिय प्रचलन समेतको विपरीत हुने बताउनुभयो ।
प्रधानमन्त्रीले मन्त्री फेरबदल गर्ने निर्णय कार्यान्वयन गर्न नमानेपछि अध्यक्ष नेपालले केही मन्त्रीहरूलाई बोलाएर सोमबार नै छलफल गर्नुभएको छ ।
छलफलमा अध्यक्ष नेपालले आफूले अन्यथा निर्णय नगरेको भन्दै काममा निरन्तरता दिन मन्त्रीहरूलाई आग्रह गर्नुभएको थियो ।
अध्यक्ष नेपालले पुराना मन्त्रीहरूलाई फिर्ता बोलाउनु उनीहरूलाई दण्डित गरेको नभएर अन्य नेताहरूलाई पनि मौका दिनु रहेको बताउँदै आउनुभएको छ ।
© copyright 2016-2019 and all right reserved to jaljalakhabar | Site By : sobij
