रेशम चौधरीको क्षेत्रमा ठुला दलले कसलाई बनाउँदैछन् उम्मेदवार ?

कैलाली । आसन्न निर्वाचन अन्तर्गत प्रतिनिधिसभातर्फ कैलाली क्षेत्र नम्बर १ को अवस्थाबारे सर्वत्र चासो बढेको छ । २०७४ सालको निर्वाचनमा यस क्षेत्रबाट निर्वाचित रेशम चौधरी जेलमै रहेका कारण यो क्षेत्र जनप्रतिनिधिविहीन जस्तै रहँदै आयो ।

आसन्न निर्वाचनमा यस क्षेत्रबाट चौधरीकै पत्नी तथा नागरिक उन्मुक्ति पार्टीकी अध्यक्ष रंजिता श्रेष्ठ चौधरीले उम्मेदवारी दिने चर्चा छ । त्यसैले पनि यो क्षेत्र अहिले सर्वत्र चासोको विषय बनेको छ ।

वैशाखमा सम्पन्न स्थानीय तहको निर्वाचन परिणाम अनुसार यो क्षेत्रमा रेशम चौधरीकै दल नागरिक उन्मुक्ति पार्टीको बलियो प्रभाव देखिन्छ । त्यसैले प्रतिनिधिसभा निर्वाचनमा चौधरीकी धर्मपत्नी रंजिता श्रेष्ठ चौधरीको उम्मेदवारी सत्तारुढ गठबन्धन तथा नेकपा एमालेका लागि पनि चुनौतीको विषय बन्न सक्छ ।

स्थानीय तह निर्वाचनमा जानकी गाउँपालिकाको अध्यक्ष र उपाध्यक्ष, टीकापुर नगरपालिकाको प्रमुख, जोशीपुर गाउँपालिकाको अध्यक्ष र उपाध्यक्ष, भजनी नगरपालिकाको प्रमुख र उपप्रमुख पदमा जित हासिल गरेको नागरिक उन्मुक्ति पार्टीले कैलाली जिल्लामा जबर्जस्त उपस्थिति जनाइसकेको छ । स्थानीय तह निर्वाचनमा यो पार्टीले जितेकामध्ये अधिकांश वडा कैलालीको क्षेत्र नम्बर १ मै पर्दछन् । त्यसैले पनि प्रमुख राजनीतिक दलहरुलाई नागरिक उन्मुक्ति पार्टीले आसन्न निर्वाचनमा ठुलो चुनौती दिनसक्ने जानकारहरु बताउँछन् ।

२०७४ सालको प्रतिनिधिसभा चुनावमा तत्कालीन राजपा पार्टीबाट उम्मेदवार बनेका रेशम चौधरीले ३४ हजार ३४१ मत ल्यायर विजयी भएका थिए ।