आज बस्ने भनिएकाे प्रतिनिधि सभाकाे बैठक स्थगित

काठमाडौं । प्रतिनिधि सभाको आइतबार ११ बजे बस्ने भनिएकाे बैठक स्थगित भएको छ ।

नेपाली कांग्रेसका नेता तथा सांसद प्रदिप गिरीको निधन भएका कारण बैठक स्थगित भएको हो । प्रतिनिधि सभाको नियमावली, २०७५ को नियम ६ को उपनियम (३) बमोजिम उक्त बैठक सोमबार दिउँसो १ बजे बस्ने संघीय संसद सचिवालयले जारी गरेको सूचनामा उल्लेख गरिएको छ ।

संसद सचिवालयले आइतबार नै शोक प्रस्ताव पारित गरेर बैठक अघि बढाउने तयारी गरेकाे थियाे । तर नेकपा एमालेका प्रमुख सचेतक विशाल भट्टराईले सभामुख अग्नि सापकोटालाई नेता गिरीको अन्तिम संस्कार नभई शोक प्रस्ताव पारित गर्नु राम्रो नहुने भन्दै बैठक स्थगित गर्न सुझाव दिनुभएको हाे ।

नेता गिरीको अन्तिम संस्कारअघि श्रद्धान्जलीका लागि पार्टी कार्यालयमा पार्थिव शरीर राख्ने र साँझसम्ममा अन्त्येष्टि हुने भएकाले बैठक स्थगित गरिएको हो । प्रतिनिधिसभाको आइतबारको बैठकमा सत्यनिरुपण तथा मेलमिलाप आयोग तथा बेत्तपा पारिएको व्यक्तिको छानविन आयोग सम्बन्धी विधेयक प्रस्तुत गर्ने कार्यसूची रहेकाे थियो ।