सञ्चारमाध्यममा २५ प्रतिशत महिला पत्रकार क्रियाशिल

काठमाडौं । नेपालका सञ्चारमाध्यममा  श्रमजीवी पत्रकार महिलाको संख्या २५ प्रतिशत रहेको छ । सञ्चारिका समूहले २०७२ सालमा गरेको अध्ययनले यस्तो तथ्याङक देखाएको हो ।

समूहले नेपालमा पत्रकार महिलाको पेशागत अवस्थाबारे गरेको अध्ययन प्रतिवेदन ललितपुरको कुपण्डोलमा रहेको सञ्चारिका समूहको कार्यालयमा बुधबार आयोजित एक कार्यक्रमका विच सार्वजनिक गरेको हो ।

प्रतिवेदन अनुसार ९ सय ७ सञ्चारगृहमा ७ हजार ६ सय ५० पत्रकार कार्यरत छन् । तीमध्ये श्रमजीवी पत्रकारमा पुरूष ५ हजार ७ सय ११ जना छन् भने महिला १ हजार ९ सय ३९ जना अर्थात् २५.३ प्रतिशत छन् ।

अध्ययनमा सहभागीमध्ये ६२.१ प्रतिशत रेडियोमा कार्यरत छन् । पत्रकार महिलामध्ये छापामा २२.६ प्रतिशत,   टेलिभिजनमा १०.७ प्रतिशत र अनलाइनमा ७ प्रतिशत पत्रकार महिला कार्यरत छन् ।

यस्तै पत्रकारिताका माथिल्ला पदहरुमा पत्रकार महिलाको उपस्थिति चिन्ताजनक देखिएको भने राजनीति र अर्थ जस्ता विटमा महिला पत्रकारको संख्या न्यून देखिएको छ । थोरै पत्रकार महिलाले मात्र राजनीति, अर्थ, अन्तर्राष्ट्रियलगायतका बिटमा काम गर्ने अवसर पाएका छन् ।

सञ्चारमाध्यममा न्यूनतम र नियमित पारिश्रमिक नपाउने समस्या विकराल बन्दै गएको पनि सर्वेक्षणमा उल्लेख गरिएको छ । सर्वेक्षण गरिएका ४१.४ प्रतिशत पत्रकार महिलाले न्यूनतम पारिश्रमिक नपाएको बताए ।

प्रतिवेदनमा माथिल्ला पदमा कम छन महिला रहेको , पदोन्नतीमा समस्या रहेको, महिला मैत्री कार्यालय नभएको, कम तलब दिने गरिएकोलगायतका समस्या समेत औंल्याइएको छ ।

प्रतिवेदन सार्वजनिक कार्यक्रममा बोल्दै प्रमुख अतिथि सञ्चार मन्त्रालयका सचिव दिनेश थपलियाले पत्रकारितामा महिलाको उपस्थिती उत्साहजनक भएको बताए ।

कार्यक्रममा पत्रकार महासंघका अध्यक्ष डाक्टर महेन्द्र विष्टले यो तथ्याङले सुधारोन्मुख संकेत देखाएको बताए । पत्रकार महिला अहिले राजनिति, आर्थिक र संसद विटमा काम गर्न थालेकोमा विष्टले खुशी व्यक्त गरे ।

नेपालमा कति पत्रकार महिला छन् भन्ने कुरा थाहा नहुँदा समस्या पर्ने गरेकोले पनि यो अध्ययन गरेको समूहकी अध्यक्ष निर्मला शर्माले बताईन ।

कार्यक्रममा सञ्चारिका समूहकी पुर्व अध्यक्ष तथा सल्लाहकार बविता बस्नेत, नर्वेजियन दुतावासकी राजनिति तथा सामाजिक विकास सम्वन्धि बरिष्ठ सल्लाहकार कमला विष्ट र अध्ययनका अनुसन्धानकर्ता टंक अर्यालले बोलेका थिए ।