राष्ट्रपतिदेखि सेनापतिसम्म भेटेर दिल्ली फर्किए सिंह

काठमाडौं ।  नेपाली सेनाका प्रधान सेनापति राजेन्द्र क्षत्रीको औपचारिक निमन्त्रणमा नेपाल भ्रमणमा आएका भारतिका स्थल सेनाध्यक्ष दलबिर सिंह आफ्नो तीन दिने भ्रमण सकेर दिल्ली फर्किएका छन् ।
आइतबार उनलाई नेपाली सेनाका बलाध्यक्ष रथी पूर्णचन्द्र थापाले त्रिभुवन अन्तर्राष्ट्रिय विमानस्थलबाट बिदाई गरेका छन् ।

सिंहले भ्रमणका क्रमा राष्ट्रपति विद्या भण्डारी, प्रधानमन्त्री प्रचण्ड, रक्षामन्त्री बालकृष्ण खाँण तथा नेपाली सेनाका प्रधान सेनापतिसँग छुट्टाटुट्टै भेटवार्ता गरेका थिए ।
उनले नेपाली सेना र भारतीय सेना बीच रुपन्देहीको सालझण्डीमा संचालन भई रहेको संयुक्त अभ्यास ‘सूर्य किरण’ को निरीक्षण भ्रमण गरेका थिए ।
छिमेकी मित्रराष्ट्रका उच्चपदस्थ सैनिक अधिकारीहरुको यस्तो भ्रमणले दुई देश बिचको सैनिक सम्बन्धलाई अझ सुमधुर बनाउन थप मद्दत पुगेको नेपाली सेनाले जनाएको छ ।