मापदण्ड मिचिएका घरहरूलाई कानुनी मान्यता दिने तयारी

काठमाडौँ  । काठमाडौं महानगरपालिकाले सामान्य किसिमको मापदण्ड मिचिएका घर तथा भवनहरूलाई कानुनी मान्यता दिने तयारी गरेको छ ।पछिल्लो समय उपत्यकाभित्र मापदण्डविपरीत बनेका भवनहरूको संख्या अत्यधिक भएपछि महानगरपालिकाले सामान्य प्रकृतिको मापदण्ड मिचिएको भए त्यस्ता भवनहरूलाई कानुनी मान्यता दिने तयारी गरेको हो ।

महानगरपालिकाभित्रका ८० प्रतिशत भवन कुनै न कुनै रूपले मापदण्ड मिचेर बनाइएको अनुमान गरिएको छ ।मापदण्ड मिचिएका भवनलाई कानुनी मान्यता दिन महानगरपालिकाले सबभन्दा पहिला सबै घर तथा भवनहरूको विस्तृत विवरण संकलन गर्नेछ । महानगरपालिकाले आगामी पुस मसान्तभित्र आ–आफ्ना घर तथा भवन विवरणसहित दर्ता गर्न सार्वजनिक सूचना जारी गरेको छ ।

भवन निर्माण स्वीकृति नलिई बनाइएका भवन भए त्यस्ता भवन पनि स्केच, क्षेत्रफल र तलासहित विवरण आफैं घोषणा गरी महानगरपालिकामा बुझाउन भनिएको महानगरपालिकाका सूचना अधिकृत महेश काफ्लेले बताए ।कानुनबमोजिम बनेका तथा कानुनविपरीत बनेका सबैखाले घर तथा भवनहरूको विवरण संकलन भएपछि सानातिना नियम उल्लंघन भएका भवनलाईचाहिँ छुट दिइने उनले बताए, राजधानी दैनिकमा खबर छ ।