पत्रकार बोहराको पशुपति आर्यघाटमा अन्त्येष्टि १२ मङ्सिर

काठमाडौँ । पत्रकार कर्ण बोहराको पशुपति आर्यघाटमा अत्येष्टि गरिएको छ । शुक्रबार मध्यबानेश्वरस्थित भेनस अस्पतालमा निधन भएका बोहराको आज साँझ अन्त्येष्टि गरियो ।

श्रीमती ममता बोहरालाई मध्यवानेश्वरस्थित भेनस अस्पतालमा उपचार गराइरहेका बोहराको कुरुवा रहेको अवस्थामा अचानक निधन भएको हो ।

महासङ्घका अध्यक्ष डा महेन्द्र विष्टले बोहराको पार्थिव शरीरमा महासङ्घको लोगो अङ्कित झण्डा ओढाई श्रद्धाञ्जलि व्यक्त गरे ।

अन्त्येष्टि कार्यक्रममा सूचना तथा सञ्चारमन्त्री सुरेन्द्रकुमार कार्की, भौतिक पूर्वाधार तथा यातायात मन्त्री रमेश लेखक, सांसद प्रेम आले, नेकपा ९माओवादी केन्द्र०का प्रवक्ता पम्फा भुसाल, प्रेस काउन्सिल नेपालका अध्यक्ष बोर्णबहादुर कार्की, राष्ट्रिय सूचना आयोगका आयुक्त किरण पोखरेल, न्यूनतम पारिश्रमिक निर्धारण समितिका अध्यक्ष पोषण केसी, प्रेस चौतारीका अध्यक्ष गणेश बस्नेत, प्रेस सेन्टर नेपालका अध्यक्ष महेश्वर दाहाल, प्रेस युनियन नेपालका महासचिव अजयबाबु सिवाकोटीलगायतको उपस्थिति थियो ।

बोहराको पार्थिव शरीरमा उनका दाजु जयलाल बोहराले दागबत्ती दिए । २०३५ असार २२ गते बझाङको स्याँडी गाविस–६ मा जन्मिनुभएका बोहरा नेपाल पत्रकार महासङ्घ कञ्चनपुर शाखाको २०६८ देखि २०७१ सम्म अध्यक्ष रहेका थिए ।

बोहरा कञ्चनपुरको महेन्द्रनगरबाट प्रकाशित हुने ‘पश्चिम नेपाल’ दैनिकका प्रकाशक तथा ‘रेडियो पश्चिम नेपाल एफएम’का सञ्चालक थिए ।

यसैगरी न्यूजट्वान्टीफोर टेलिभिजनका सुदूरपश्चिम ब्युरो प्रमुखसमेत रहेका बोहरा श्रीमतीको मिर्गौलाको उपचारका क्रममा काठमाडौँ आएका थिए । उनी मधुमेह रोगबाट ग्रसित रहेका थिए ।