सरकारी वकिलहरुको प्रथम राष्ट्रिय सम्मेलन शुक्रबारदेखि

काठमाडौं  । सरकारी वकिलहरुको प्रथम राष्ट्रिय सम्मेलन पुस ८ गतेबाट सुरु हुने भएको छ ।

मुलुक संघीय संरचनामा गएपछि अदालतको संरचना र महान्यायधिवक्ताको कार्यालयको क्षेत्राधिकारका विषयमा छलफल हुने गरी काठमाडौंमा सम्मेलन हुने जानकारी गराइएको हो ।
महान्यायाधीवक्ताको कार्यालयले बुधबार पत्रकार सम्मेलन गरी न्यायपालिकाको संरचना, महान्यायधीवक्ताको कार्यालयको कार्यक्षेत्रमा भएको पुनरावलोकन लगायतका बारे वृहत्तर छलफल हुने गरी सम्मेलन आयोजना गरिएको उल्लेख गरेको छ ।

पत्रकार सम्मेलनमा बोल्दै महान्यायाधिवक्ता रमन श्रेष्ठले संविधानको नयाँ व्यवस्था अनुसार अन्य सरकारी निकायसँग सरकारी वकिलले समन्वय गरेर कसरी काम गर्ने भन्ने बारेमा सम्मेलनमा गहन छलफल हुने बताए ।

उनले घटनाको अभियोजन र अनुसन्धानमा प्रहरी र सरकारी वकिलबीच भएका समस्याको बारेमा पनि सम्मेलनमा छलफल हुने स्पष्ट पारे ।
महान्यायधिवक्ता श्रेष्ठले अञ्चल प्रहरीले अपराध अनुसन्धानको जिम्मा पाएकाले सरकारी वकिल र प्रहरीबीच हुने असमझदारी हटाएर कार्यशैलीमा एकरुपता ल्याउन सम्मेलन केन्द्रीत हुने पनि उल्लेख गरे ।

सम्मेलनमा फौजदारी न्याय प्रशासन र फौजदारी कानुनहरुमा भएको नयाँ व्यवस्थाका बारेमा सरकारी वकिलहरुको साझा धारणा बनाइने पनि उल्लेख गरिएको छ । महान्यायधिवक्ताको कार्यालयका कमि कम्जोरी पत्ता लगाइ कार्यशैली सुधार गर्ने बारेमा पनि सुझाव लिन सम्मेलन फलदायी हुने आयोजकहरुले जनाएका छन ।

सम्मेलनको उदघाटन राष्ट्रपति विद्या भण्डारीले गर्नु हुनेछ । सम्मेलनमा महान्यायधिवक्ता, नायव महान्यायधिवक्ता, सहन्यायधिवक्ता, लगायत सरकारी वकिलसहित ३ सय ५० भन्न्दा बढि सहभागी हुनेछन । सम्मेलनमा पाँच विकास क्षेत्रमा केन्द्रित भएर ३० वटा कार्यपत्र प्रस्तुत हुने प्रेस विज्ञप्तीमा उल्लेख गरिएको छ ।