आज क्रिसमस, अब सरकारले तीन दिन बिदा दिनुपर्ने माग

काठमाडौं । इसाई धर्मालम्बिहरुको महान चाड क्रिसमस डेको अवसरमा नेपालमा पनि विभिन्न कार्यक्रम आयोजना गरिएको छ ।
काठमाडौ लगायतका देशका मुख्य मुख्य सहरको चर्चहरुमा जम्मा भएका इसाई धर्मालम्बिहरुले भोजमा सहभागी भई शुभकामना आदान प्रदान गरी यो पर्व मनाईरहेका छन ।
काठमाडौको ठमेल, बौद्ध, ललितपुरको पाटन, भक्तपुरको दरबार क्षेत्र लगायतमा चर्चहरुमा जम्मा भएर उनीहरुले एक अर्काबीच सुख, शान्ति र समृद्धिको कामना गरेका छन ।

यसै अवसरमा सरकारले सार्वजनिक विदा समेत दिएको छ । आफूहरुले दवाव दिएपछि सरकारले यस अवसरमा सार्वजनिक विदा दिएको राष्ट्रिय ख्रिष्टियन महासंघका अध्यक्ष सिबी गहतराजले बताए ।
उनले अव तीन दिनसम्म यो पर्वको अवसरमा सरकारले विदा दिनुपर्ने माग पनि गरे ।
अध्यक्ष गहतराजले नेपालमा ३० लाख भन्दा बढि ख्रिष्टियन रहेको र उनीहरुको पर्वलाई राष्ट्रिय पर्वको रुपमा उल्लेख गर्न सरकारले अलमल गर्न नहुने धारणा पनि राखे ।

नेपालमा चार सय वर्ष अघि देखि क्रिसमस मनाउन थालिएको दावी गरिएको छ । क्रिसमसको उपलक्ष्यमा क्रिसमस ट्रि लगायतले चर्चहरु सजाइएका छन । इसाई धर्मका संस्थापक येशु ख्रिष्टको जन्मोत्सव डिसेम्बर २५ तारिकका दिन यो पर्व विश्वभर मनाउने गरिन्छ ।
आज भन्दा २ हजार १६ वर्ष अघि इजरायलको जेरुसेलमस्थित बेथलेहममा येसुको जन्म भएको बताइन्छ ।