कोहलपुरमा १३ किलो अफिमसहित दुई पक्राउ

 प्रहरीले बाँकेको कोहलपुरबाट १३ किलो ६४ ग्राम अफिम र १४८ ग्राम चरेससहित दुई जनालाई पक्राउ गरेको छ ।

लागुऔषध नियन्त्रण ब्युरो नेपालगञ्ज र सुर्खेतस्थित संयुक्त टोलीले विशेष सूचनाका आधारमा कोहलपुर नगरपालिका–६ बाट उनीहरूलाई पक्राउ गरिएको जिल्ला प्रहरी कार्यालय, बाँकेका प्रहरी नायब उपरीक्षक प्रतीतसिंह राठौरले जानकारी दिए ।

उनका अनुसार रुकुमपूर्वका कर्णबहादुर बुढा र रुकुम पश्चिमका टोपजंग भन्ने टाइपसिंह गिरीलाई लागु औषधसहित पक्राउ गरिएको हो । उनीहरूसँग एक थान डिजिटल तराजु, नगद रु. पाँच हजारसमेत बरामद भएको प्रहरीले जनाएको छ । प्रहरीका अनुसार उनीहरूलाई पक्राउ गर्न एक राउण्ड हवाई फायरसमेत गरिएको थियो ।