हिमनदी पग्लिँदा खुल्दैछ स्विट्जरल्याण्डको इतिहास

काठमाडौँ। जलवायु परिवर्तनका कारण तीव्र गतिमा पग्लिरहेका स्विट्जरल्याण्डका हिमनदीभित्र वर्षौंदेखि दबिएका पुराना वस्तु, ऐतिहासिक सामग्री र वातावरणीय परिवर्तनका प्रमाणहरू बाहिर आउन थालेका छन्। यिनै दुर्लभ वस्तुहरू समेटेर लुसर्नस्थित ग्लेसियर गार्डेनले ‘ट्रेजरी अफ आइस’ (बरफको खजाना) नामक विशेष प्रदर्शनी आयोजना गरेको छ।

प्रदर्शनीमा प्राचीन सिकारीका धनुष, रोमनकालीन मूर्ति, गाईको खप्पर, स्विस सेनाको पुरानो चक्कु, फुटेको हेल्मेट, मेयोनेजको ट्युब, वाइनको बोतल र स्कीका सामग्रीहरू राखिएका छन्। वस्तुहरूलाई प्रयोगशालामा प्रयोग हुने सेता बाकसहरूमाथि सजाइएको छ भने पग्लँदै गरेको बरफको सिलिन्डरमार्फत प्रकृतिमा भइरहेको तीव्र परिवर्तनलाई दर्शाउन खोजिएको छ।

यस वर्ष स्विस हिमनदीको कुल क्षेत्रफलको ५.५ प्रतिशत भाग गुमेको छ, जुन इतिहासकै दोस्रो ठूलो गिरावट हो। ग्लेसियर गार्डेनका निर्देशक आन्द्रेयास बुरीका अनुसार हिमनदी पूर्ण रूपमा हराउनुअघि वातावरणीय इतिहासका महत्त्वपूर्ण अभिलेख सर्वसाधारणलाई देखाउन यो प्रदर्शनी आयोजना गरिएको हो।

प्रदर्शनीमा ठोस वस्तुका साथै बरफमा जमेर बसेका परागकण, हरितगृह ग्यास, २०औँ शताब्दीको आणविक परीक्षणका रेडियोधर्मी कण र १६औँ शताब्दीको डढेलोबाट उत्पन्न कोइलाका अवशेषसमेत प्रस्तुत गरिएको छ। मानव अवशेषहरू प्रदर्शनीमा नराखिए पनि हिमनदी पग्लँदा दशकौँअघि बेपत्ता पर्वतारोहीका शवहरू फेला पर्ने क्रम बढेको छ। यो प्रदर्शनी आगामी अगस्ट २२ सम्म सञ्चालन हुनेछ।