कास्कीमा असोज महिनामा ५९ सवारी दुर्घटना: ११ जनाको मृत्यु, १०१ घाइते

काठमाडौँ। कास्की जिल्लामा गत असोज महिनामा भएका ५९ वटा सवारी दुर्घटनामा परी ११ जनाको मृत्यु भएको छ भने १०१ जना घाइते भएका छन्। जिल्ला प्रहरी कार्यालयका अनुसार अन्य महिनाको तुलनामा असोजमा दुर्घटना र मानवीय क्षति बढी भएको हो।

दुर्घटनामा ७९ वटा सवारीसाधन संलग्न रहेका थिए भने प्रहरीले चालकहरूलाई नियन्त्रणमा लिई अनुसन्धान तथा कारबाही प्रक्रिया अघि बढाएको छ। जिल्ला प्रहरी कार्यालयका सूचना अधिकारी तथा प्रहरी नायब उपरीक्षक वीरेन्द्रकुमार पासवानका अनुसार तीव्र गतिकै कारण सबैभन्दा बढी (२० वटा) दुर्घटना भएका हुन्।

गत असोज २३ गते भएको कालिका बोर्डिङ स्कुलको बस दुर्घटनामा मात्रै ५ विद्यार्थीसहित ६ जनाको ज्यान गएको थियो। दुर्घटनाका अन्य कारणहरूमा मादक पदार्थ सेवन (१०), सवारीचालक अनुमतिपत्र नहुनु (५), यान्त्रिक समस्या (१) र अन्य विविध कारण (२३) रहेका छन्।

यस्तै, प्रहरीले असोज महिनामा सवारी नियम उल्लङ्घन गर्ने ४ हजार ७८५ वटा कारबाहीबाट रु. ३९ लाख ९८ हजार ५०० राजस्व सङ्कलन गरेको छ। विपद्तर्फ सुक्खा पहिरोमा परी २ जनाको मृत्यु भएको छ भने आगलागीका ५, अविरल वर्षाका २८, चट्याङका २ (जसमा ३ चौपायाको मृत्यु) र सुक्खा पहिरोका २ घटना दर्ता भएका छन्।

अविरल वर्षाका कारण ४ घरमा आंशिक क्षति पुगेको छ। यसका साथै प्राकृतिक सम्पदा दोहन नियन्त्रणका क्रममा ७ वटा सवारीसाधन नियन्त्रणमा लिई कारबाही गर्दा रु. १ लाख १४ हजार राजस्व सङ्कलन भएको छ।