गस्तीमा रहेका दुई पुलिसले नै पसलमा चोरी

भारत । भारतको झारखण्डको गिरीडीहको एक पसलमा दुई पुलिसकर्मीहरुले चोरी गरिरहेको दृश्य सार्वजनिक भएपछि उनीहरुलाई निलम्बित गरिएको छ ।

गिरिडीहका पुलिस अधिकारी अखिलेश वी वारियरले उनीहरुलाई निलम्बन गरिएको पुष्टि गर्दै दुबै जवानका विरुद्ध स्थानीय नगरमा जाहेरी दर्ता गरेको बताएका छन् ।

टुंडी रोडस्थित कागजको एक पसलमा शटर तोडेर चोरी गर्ने कोसिस गरेको घटनाबारे पुलिस थानालाई जानकारी दिइएको थियो । पसलेले ४ सय रुपैयाँ चारी भएको मुद्दा दर्ता गराएका थिए । छानबिनका लागि सीसीटीभी फुटेज जाँचियो । पुलिस अधिकारीका अनुसार टाइगर मोबाइल अन्र्तगतका दुई जवान राती नगर थाना क्षेत्रमा गस्तीमा थिए ।

पुलिसको भनाई अनुसार प्रारम्भिक रुपमा फुटेजमा टाइगर मोबाइलको एक जवानले पैसा निकालिरहेको देखिएको छ । छानबिनका क्रममा यो पत्ता लाग्यो कि जब चोर सटर तोडेर भागे त्यसको करिब डेढ घण्टापछि पुलिसका जवान त्यहाँ पुगे र चोरी गरे ।

पछिल्ला केही दिनमा झारखण्डमा पुलिसकर्मीहरु आपराधिक र हिंसाजन्य घटनामा संलग्न भएका कम्तीमा दर्जन घटना सार्वजनिक भएका छन् ।