कर्मचारीलाई धेरै काम लगाएको भन्दै जापानको सबैभन्दा ठूलो विज्ञापन एजेन्सीमा छापा

टोकियो  । आफ्ना कामदारहरुलाई धेरै काम लगाएको भन्दै जापानको सबैभन्दा ठूलो विज्ञापन एजेन्सीको विभिन्न अफिसहरुमा सरकारले छापा मारेको छ ।

कम्पनीका एक २४ वर्षीय कर्मचारीले आत्महत्या गरेपछि जापानको श्रम मन्त्रालयले कम्पनीमा छापा मारेको हो । ती कर्मचारीको धेरै काम लगाएर मृत्यु भएको मन्त्रालयको ठहर छ ।

टोकियोमा रहेको डेन्टसु नामक कम्पनीको अफिसमा सोमबार बिहान मन्त्रालयका अधिकारीहरु पुगेर छापा मारेको विविसीले उल्लेख गरेको छ ।

त्यस्तै, कम्पनीको ओशाका, क्योटो र नागोयामा रहेको अफिसमा छापा मारिएको छ । गत अक्टोबरमा पनि टोकियो अफिसमा छापा मारिएको थियो ।

गत डिसेम्बरमा आत्महत्या गरेका ती महिला कर्मचारीले मृत्यु हुनभन्दा एक महिनाअघि १०५ घण्टा ओभरटाइम गरेकी थिइन् । उनी डिप्रेसनको सिकार भएको बताइएको छ ।

जापानमा धेरै ओभरटाइम लगाउने र समयमा पैसा नदिने ठूलो समस्या रहेको छ ।

डेन्टसु कम्पनीले यसबारे आन्तरिक छानविन समेत शुरु भएको बताएको छ । कम्पनीले यसबारे आफूहरु निकै गम्भिर रहेको यस्तो परम्परा कम्पनीबाट हटाउन आफूहरु प्रतिबद्ध रहेको जनाएको छ ।