प्रकाशित मिति : आइतवार, कार्तिक २८, २०७३
पेरिस । पेरिस हमलाका दौरान ८९ जनाको हत्या भएको बाटाक्लान कन्सर्ट हल एक वर्षपछि पुनः सञ्चालनमा आएको छ । चर्चित ब्याण्ड स्टिङले कार्यक्रम गर्दै उक्त कन्सर्ट हल पुनः सञ्चालनमा ल्याइएको हो ।
हमला भएको एक वर्ष पुग्न ठीक एक दिन अघि गरिएको कन्सर्टमा उक्त हमलामा बाँचेकाहरु पनि उपस्थित थिए भने ज्यान गुमाएका परिवारका सदस्यहरु पनि उपस्थित थिए । बेलायती गायकले मृतकहरुलाई श्रद्धाञ्जली दिँदै बाँचेकाहरुले अब आफ्नो जीवन खुसी साथ जिउनुपर्ने बताए ।
कन्सर्ट शुरु हुनअघि इस्लामिक स्टेटका चरमपन्थीहरुद्वारा मारिएकाहरुका लागि मौनधारणसमेत गरिएको थियो ।
गत वर्षको नोभेम्बर १३ मा भएको हमलामा उक्त हलमा क्षति पुगेको थियो । त्यसको मर्मत सम्हार पछि उक्त हल पुनः खुला गरिएको हो ।
मानिसहरु डर र त्रासलाई भुलाउँदै कन्सर्ट शुरु हुनभन्दा घण्टौँ अघिदेखि हलबाहिर लाइनमा बसेका थिए ।
आयोजकका अनुसार कन्सर्टका सबै टिकट आधा घण्टामा बिक्री भएका थिए ।
उक्त कन्सर्टबाट उठेको रकम स्टिङले उक्त घटनमा बाँचेकाहरुका लागि खोलिएको दुईवटा च्यारिटीमा सहयोग गर्नेछन् ।
एक घण्टा लामो कार्यक्रम शुरु गर्न अघि उनले भने, ‘हामी उनीहरुलाई भुल्ने छैनौँ ।’
सन् २०१५ मा भएको पेरिस हमलामा १३० जनाले ज्यान गुमाएका थिए ।
© copyright 2016-2019 and all right reserved to jaljalakhabar | Site By : sobij
