चोरिएको ड्रोन चीनबाट फिर्ता चाँहिदैनः ट्रम्प

नवनिर्वाचित अमेरिकी राष्टपति डोनल्ड ट्रम्पले चीनले जफत गरेको ड्रोन आफूसँगै राख्न सल्लाह दिएका छन् । अमेरिकी रक्षा विभाग पेन्टागनले चीनले अमेरिकाको समुन्द्री ड्रोन फिर्ता गर्ने तयारी गरिरहेको बताएपछि ट्रम्पको यस्तो बयान सार्वजनिक भएको हो ।

ट्रम्पले आफ्नो ट्वीटर अकाउन्टमा लेखेका छन्, ‘हामीले चीनलाई यो भन्न आवश्यक छ कि चीनले चोरेको ड्रोन हामी फिर्ता चाहन्नौं । यसलाई चीनले आफूसँगै राख्दा हुन्छ ।’

यद्यपी, पेन्टागनले बिहिबार दक्षिण चीन सागरमा जफत गरिएको ड्रोनलाई फिर्ता गर्नका लागि चीनसँग सहमती भएको बताएको थियो ।

पेन्टागनका प्रवक्ता पीटर कुकुले शनिबार दिएको जानकारी अनुसार चीन प्रसाशनको सिधा सम्पर्कमार्फत चीनले अमेरिकाको यूयूवी (मानवरहित समुन्द्री वाहन) फिर्ता गर्ने सहमती भएको छ ।

योभन्दा पहिले चीनका रक्षा मन्त्रालयले अमेरिकी प्रतिक्रियाको आलोचना गरेको थियो ।

चीनले अमेरिकामाथि यो विषयलाई चाहिनेभन्दा बढि चर्चा गरेको आरोप लगाएको छ ।

अमेरिकाले चीनको समुन्द्रमा निगरानीको काम बन्द गनुपर्ने चीनको भनाई छ ।

चीनको तर्फबाट यो बयान ट्रम्पले ट्वीटरमा दिएको प्रतिक्रिया पछि सार्वजनिक भएको हो ।

ट्रम्पले ट्वीटरमा यो मुद्दाको उठान गर्दै चीनमाथि ‘चोरी’ को आरोप लगाएको थियो ।

ट्रम्पले ट्वीटरमा लेखेका छन्, ‘अन्तर्राष्ट्रिय जल सीमामा चीनले अमेरिकीको नेवी रिसर्च ड्रोनलाई चोरेको छ । उनीहरुले यसलाई पानीबाट निकालेर चीन लिएर गए । यो पहिलो घटना हो ।’

ट्रम्पले यो महिनाको सुरुवातमा ताइवानका राष्ट्रपतिसँग फोनमा कुराकानी गरेका थिए । यो कुराकानीमार्फत उनले अमेरिकाको दशकौं पुरानो चीन–ताइवान नीति तोडेका छन् जसलाई चीनले विरोध गरेको थियो ।