दुबइबाट एक युवती सहित चार नेपालीको उद्दार

काठमाडौँ । रोजगारीका लागि दुवई पुगेर अपलत्र परेका चार नेपालीलाई उद्दार गरेर काठमाडौं फर्काइएको छ ।

यसरी उद्दार गरेर काठमाडौं ल्याइएकाहरुमा नवलपरासी स्थायी घर भएकी मालती ठकुरी, महोत्तरीका बिरेन्द्र सहनी, रविन्द्र सहनी र धमानीकुमार सहनी रहेको महानगरीय अपराध महाशाखाले जनाएको छ ।

नवलपरासीको कावासोती नगरपालिका–४ घर भएकी २० बर्षिया मालती ठकुरीलाई नवलपरासि देउराली–२ घर भएकी प्रेम कुमारी मल्लले आर्थिक प्रलोभन देखाएर दुवई पठाएकी थिइन् ।

दुवईमा बिरामी भएका कारण नेपाल फर्कन खोज्दा मालतीलाई उल्टो ओमान लैजान लागेपछी अनिशा शाहीको उजुरीका आधारमा उनको उद्दार गरिएको प्रहरीले जनाएको छ ।

त्यस्तै महोत्तरी सांढा–९ का तिन जना सहनीलाई पाँच तारे होटलमा काम लाईदिन्छु भन्दै दुवई पठाएपनी समयमा तलव नदिएको, संझौता अनुसारको काम नदिएको र १४ घण्टा सम्म काममा लगाएको तथा ज्यानको सुरक्षामा समेत खतरा बढेको उजुरी परेपछी महाशाखाको पहलमा उद्दार गरिएको हो ।