यी तीन कारणले पाकिस्तानमा प्रतिबन्धित भयो ‘रईश’

पाकिस्तानको सेन्सर बोर्डले बलिउड अभिनेता शाहरुख खानको ‘रईश’माथि प्रतिबन्ध लगाएको छ। फिल्म आइतबारबाट रिलिज हुने तय भएको थियो। फिल्म प्रतिबन्धमा परेपछि फिल्मका निर्देशक राहुल ढोलकियाले निराशा व्यक्त गरेका छन्। उनीसँगै ‘रईश’ हेर्न प्रतिक्षा गरिरहेका केही पाकिस्तानी दर्शकले समेत पाकिस्तान सेन्सरको प्रतिबन्दप्रति निराशा व्यक्त गरेका छन्।

‘रईश’लाई प्रतिबन्ध लगाउनुमा निम्न कारणहरू कारक रहेको पाकिस्तान सेन्सर बोर्डले जनाएको छ।

१.       पाकिस्तान इस्लामिक देश हो, त्यहाँ मादकपदार्थको विक्री-वितरण गैरकानुनी छ। फिल्म मादकपदार्थको तस्करी गर्ने ‘रईश’माथी आधारित रहेको छ। फिल्ममा सो भूमिकामा शाहरुख छन्। यसले दर्शकमाथि नकारात्मक छवि दिने सेन्सरको दाबी छ।

२.       रईश पात्र मुसलमान हो र उसको अन्डरवल्डसँग सम्बन्ध छ। फिल्मको मुख्य पात्रको नकारात्मक छविलाई बोर्डले दोस्रो कारण मानेको छ।

३.       फिल्ममा देखाइएको सुन तस्करीको दृश्य सेन्सरको बुझाइ भन्दा पर रह्‍यो। सेन्सरलाई फिल्मको एक वा दुई दृश्यमा मात्र आपत्ति नभई फिल्मका तुप्रै दृश्यसँग आपत्ति छ। त्यसै कारणले बोर्ड फिल्मलाई पास गर्न असमर्थ भयो।

फिल्ममा शाहरुखसँगै चर्चित पाकिस्तानी अभिनेत्री माहिर खान पनि मुख्य भूमिकामा रहेकी छन्। त्यसेले फिल्मले पाकिस्तानमा पनि राम्रो कमाइ गर्ने अपेक्षा ‘रईश’को निर्माण पक्षले राखेको थियो। भारतपाक सम्बन्धका कारण बलिउड फिलममाथीको प्रतिबन्ध भर्खरैमात्र फुकुवा भएको थियो।