ट्रम्पले कर तिरेको दस्तावेज लिक, ह्वाइट हाउस रुष्ट

वासिङटन । अमेरिकी राष्ट्रपति डोनाल्ड ट्रम्पले सन् २००५ मा १५ करोड डलर आम्दानीबापत ३.८ करोड डलर कर तिरेको लिक गरिएको दस्तावेजमा देखिएको छ ।

दुई पृष्ठ लामो ट्याक्स रिटर्नको दस्तावेजलाई अमेरिकी टेलिभिजन नेटवर्क एमएसएनबिसीले सार्वजनिक गरेको हो ।

कर तिरेको दस्ताव सार्वजनिक भएपछि ह्वाइट हाउसले कडा प्रतिक्रिया दिँदै सो कार्य गैरकानुनी भएको बताएको छ ।

अमेरिकी राष्ट्रपतिका दाबेदारहरुले कर तिरेको दस्तावेज सार्वजनिक गर्ने लामो चलन रहे पनि ट्रम्पले भने त्यो सार्वजनिक गर्न अस्वीकार गरेका थिए ।

२ पृष्ठ लामो दस्तावेज उनले तिरेको करको केही अंश रहेको र यसले ट्रम्पको सम्पूर्ण आम्दानी पत्ता नलाग्ने बताइएको छ ।

यद्यपि, यो सार्वजनिक भएपछि राष्ट्रपति ट्रम्पमा बाँकी दस्तावेज सार्वजनिक गर्नुपर्ने दबाब बन्न सक्ने जानकारहरु बताउँछन् ।

दस्तावेजमा ट्रम्पले आयकर बापत ५३ लाख डलर कर तिरेको र थप ३.१ करोड डलर अल्टरनेटिभ मिनिमम ट्याक्स (एएमटी) बापत तिरेको देखिएको छ ।

धनीहरुले कर छली गर्न नपाओस् भनेर एएमटीको व्यवस्था ५० वर्षअघि गरिएको थियो ।

३.८ करोड डलर कर औसत अमेरिकी नागरिकभन्दा २४ प्रतिशतले धेरै हो । तर धनाड्यहरुको औसतभन्दा २७.४ प्रतिशतले कम हो ।