भारतीय सेनालाई १९६२ को युद्ध स्मरण गर्न चिनियाँ सेनाको चेतावनी

बीबीसीकाअनुसार चीनले भारतीय सेनालाई सन् १९६२ को युद्धमा मिलेको हार स्मरण गर्दै इतिहासबाट केही सिक्नुपर्ने भन्दै चिनियाँ सेनालाई नजिस्क्याउन चेतावनी दिएको हो ।

चीनले भारतलाई सिक्किम सेक्टरको डोङलोङ क्षेत्रबाट तत्काल भारतीय सेना फिर्ता बोलाउनसमेत आग्रह गरेको छ ।

भारतले भुटानलाई ‘ढाल’ बनाएर चीन, भारत र भुटानबीचको त्रिकोणात्मक सीमा क्षेत्रमा सडक निर्माण गरिरहेको र त्यस क्षेत्र भुटान र भारत दुबैको भूमि नरहेको चीनको दाबी छ ।

भारतीय सेनाले विवादित क्षेत्रबाट बंकर हटाउन नटेरेपछि बिहीबार चिनियाँ सेनाले भारतीय पक्षबाट बनाइएका बंकर सैनिक बल प्रयोग गरेर भत्काइदिएको थियो ।

डोजरसहित आएका चिनियाँ सेनालाई रोक्न भारतीय सेनाले मानवसाङ्लो बनाएका थिए । तर, चिनियाँ सेनाले ठेलेर भारतीय सेनालाई हटाएपछि डोजर चलाएर बंकर भत्काइदिएको हो ।

विगत एक महिनाको अवधिमा त्यस क्षेत्रमा चिनियाँ सेनाले चारओटा बंकर भत्काइसकेको छ ।

गत मंगलबार चीन सरकारले कैलाश मानसरोवर यात्रामा जाने भारतीय तीर्थयात्रीका लागि खोलिएको ‘नाथुला’ प्रवेशद्वारसमेत बन्द गरिसकेको छ ।

चीनले भारतीय पक्षले सिक्किम क्षेत्रको चिनियाँ भू–भागमा अनधिकृतरुपमा सीमा अतिक्रमण गरेको भन्दै नयाँदिल्ली तथा बेइजिङस्थित भारतीय दूतावासका अधिकारीमार्फत् कूटनीतिक विरोधसमेत जनाइसकेको छ ।

भारत र चीनबीच लामो समयदेखि करिब ४ हजार किलोमिटर सीमा क्षेत्रमा झन्डै आधा हिस्सामा विवाद चर्कंदै आएको छ ।