उक्त प्रतिवेदन अनुसार, २०१६ को अन्तिम त्रैमासको तुलनामा २०१७ को पहिलो त्रैमासमा स्मार्टफोन प्रगोगकताहरुमा ७ प्रतिशतले वृद्घि भएको हो । नियमक निकाय नेपाल दूरसञ्चार प्रधिकरणको पछिल्लो विवरण अनुसार, एनसेलका ६७ लाख ३९ हजार ग्राहकले मोबाइलबाट इन्टरनेट चलाउछन्।
मोबाइल ब्रोडब्यान्ड सेवामा पहुँचका लागि स्मार्टफोन सबभन्दा सरल र सुलभ डिभाइस हो । प्रधिकरणका अनुसार डाटा सेवाको मुल्यमा गिरावट, मागमा वृृद्घि, स्मार्टफोनहरुको मुल्य पनि गिरावट आएका कारण स्मार्टफोन बोक्ने ग्राहकहरु उल्लेख्यरुपमा वृद्घि हुदै आएको छन् । नेपाली बजारमा प्रत्येक दिन जस्तो विभिन्न ब्राण्डका नयाँ मोडलका मोबाइलहरु वा नयाँ ब्राण्ड आउने गरेका छन् ।
नेपाल टेलिकमका ५० प्रतिशत ग्राहकले पनि स्मार्टफोन प्रगोग गर्ने गरेको आकलन गर्ने हो भने नेपालमा अहिले ७५ लाख जति ग्राहकले स्मार्टफोन प्रयोग गर्ने गरेको अनुमान गर्न सकिन्छ । प्राधिकरणको विवरण अनुसार, टेलिकमले हाल विभिन्न प्रकारका डाटा सेवा अन्तर्गत ८२ लाख ग्राहकलाई यो सेवा प्रदान गर्दै आएको छ । थ्रिजी सेवा र नयाँ सेवा फोरजीको विस्तारसँगै स्मार्टफोन प्रगोगकर्ताहरुमा थप बढ्ने अनुमान गरिएको छ ।
निजी क्षेत्रको सेवा प्रदायक एनसेलले डिजीटल नेपाल निर्माणमा योगदान पुर्याउन इन्टरनेट पुर्वाधारमा ३० अर्ब लगानी थप्दै सन् २०१८ भित्रमा दुर्गम र ग्रामिण क्षेत्र लक्षित गर्दै थ्रिजी सेवा देशको कुल जनसंख्याको ६० प्रतिशतमा पुर्याउने बताएको छ । त्यसैगरी कम्पनीले २०१७ भित्रमा फोरजी सेवा १५ प्रतिशत जनसंख्यामा पुर्याउने सार्वजनिक गरेको छ र देशका विभिन्न ४० सहरहरुमा यो सेवा विस्तारका लागि नेटवर्क परीक्षण लगायतका कामहरु भईरहेको जनाएको छ ।
सरकारी नेपाल टेलिकमले पनि फोरजी सेवा देशव्यापी बनाउने बताउदै आएको छ । टेलिकमले एनसेलको तुलनामा ६ महिना अधि नै फोरजी सेवा संचालनमा ल्याएको हो । यद्यपी उसले सार्वजनिक खरिद ऐन पालना गर्नु लगायकका कारणहरुले गर्दा आशातित रुपमा सेवाको विस्तार गर्न नसकेको बताउदै आएको छ । हाल टेलिकमले काठमाण्डौ उपत्यका र पोखरामा फोरजी सेवा प्रदान गर्दै आएको छ ।
एनसेलले काठमाण्डौं उपत्यका लगायत बनेपा, धुलिखेल, नगरकोट, पोखरा र दमौलीमा फोरजी सेवा प्रदान गर्दै आएको छ भने जनसंख्याको हिसाबमा १०.३ प्रतिशतमा यो सेवाको पहुँच पुर्याएको बताएको छ ।
