बससँग मोटरसाइकल ठोक्किँदा २ जनाको मृत्यु

रौतहट, मंसिर ३ । रौतहटको गरुडा नगरपालिकामा यात्रुवाहक बससँग मोटरसाइकल ठोक्किँदा दुई जनाको मृत्यु भएको छ ।

चन्द्रनिगाहपुर गौर सडकखन्डको गरुडा नगरपालिका–४ मा चन्द्रनिगाहपुरबाट गौरजाँदै गरेको बस र विपरित दिशाबाट आउँदै गरेको मोटरसाईकल एकापसमा ठोक्किँदा मोटरसाइकलमा रहेका दुबै जनाको मृत्यु भएको हो ।

मृत्यु हुनेमा मोटरसाइकल चालक देबाही गोनाही नगरपालिका–९ धरहरीका ४० वर्षीय मुन्नीलाल मिश्र र माधवनारायण नगरपालिका–३ का ३५ वर्षीय रामप्रकाश यादव छन् ।

ठक्करपछि घाइते भएका दुबैलाई उपचारका लागि चन्द्रनिगाहपुर अस्पताल ल्याउने क्रममा बाटोमै मृत्यु भएको हो । बस र बसका चालक चन्द्रपुर नगरपालिका–१ निवासी राकेशप्रताप साहलाई इलाका प्रहरी कार्यालय गरुडाले नियन्त्रणमा लिएको छ ।