सनराइज बैंकले १५ प्रतिशत बोनस सेयर वितरण गर्ने

काठमाडौं, पुस ३ । सनराइज बैंक लिमिटेडले सेयरधनीलाई चुक्तापुँजीको १५ प्रतिशत बोनस सेयर वितरण गर्ने भएको छ ।

सोमबार राजधानीमा सम्पन्न बैंकको १०औं वार्षिक साधारणसभाले उक्त प्रस्ताव पारित गरेको हो । यसबाट बैंकको चुक्तापुँजी ८ अर्ब रुपैयाँभन्दा बढी पुगेकोे छ ।

साधारणसभाले निर्वाचन सम्पन्न नभएसम्मका लागि संस्थापक सेयरधनी समूह ‘क’को तर्फबाट सन्चालक समितिमा प्रतिनिधित्व गर्ने सन्चालकहरुलाई सन्चालक समितिमा निरन्तरता दिने प्रस्तावसमेत सर्वसम्मतिले पारित गरेको छ ।

अध्यक्ष मोतीलाल दुगडले बैंकले प्रगति जारी राखेको प्रतिवेदन प्रस्तुत् गरेका थिए ।

बैंकको हाल शाखाहरुको संख्या ७० र एटीएमको संख्या ८७ रहेको छ । जसमध्ये काठमाडौं उपत्यकाभित्र २९ शाखाहरु र उपत्यकाबाहिर ४१ शाखाहरु रहेका छन् ।

बैंकले सनराइज सेफ डिपोजिट लकर सुविधा, भिसा डेबिट कार्ड, मोबाइल बैंकिङ, इन्टरनेट बैंकिङ, रेमिट्यान्स, सनराइज माइक्रो बैंकिङलगायत आधुनिक बैंकिङ सेवाहरुसमेत प्रदान गर्दै आइरहेको बैंकका प्रमुख कार्यकारी अधिकृत रत्नराज बज्राचार्यले जानकारी गराए ।