मृतकलाई शहीद घोषणा गर्ने लगायत ६ बुँदे सहमतिपछि रुपन्देही बन्द फिर्ता

रुपन्देही, पुस २३ । ब्यवसायी बसन्त पौडेलसँगै दुर्गा तिवारीलाई शहीद घोषणा गर्न सिफारिस गर्नेलगायत ६ बुँदे सहमतिपछि एमाले निकट युवा संघले तीन दिनदेखि गर्दै आएको रुपन्देही बन्द फिर्ता लिएको छ ।

पौडेल हत्याको विरोधमा अनेरास्ववियु र युवा संघले गत शनिबारदेखि अनिश्चितकालीन बन्द आह्वान गरेका थिए । प्रशासनसँग आइतबार भएको वार्तामा प्रशासनले हत्यामा संलग्नहरुलाई छिट्टै पक्राउ गर्ने, मृतक पौडेल र गत बर्ष पुसमा हत्या गरिएका दुर्गा तिवारीलाई शहीद घोषणा गर्न सिफारिस गर्ने, शान्ति सुरक्षा चुस्त बनाउने सहमति गरेको छ ।

सहमति कार्यान्वयन नभए कडा आन्दोलन गर्ने चेतावनी पनि दुबै आन्दोलनकारीले दिएका छन् । फर्निचर व्यवसायीसमेत रहेका युवा संघका कार्यकर्ता पौडेलको गत शुक्रबार रुपन्देहीको देवदहमा अज्ञात समूहले गोली हानेर हत्या गरेको थियो ।

मनोज पुन भन्ने ब्यक्तिले हत्याको जिम्मा लिएको छ भने प्रहरीले उसको संलग्नताबारे केही बताएको छैन ।