एन्फा अध्यक्षमा कर्माछिरिङको उम्मेदवारी घोषणा

काठमाडौं, माघ २७ । अखिल नेपाल फुटबल संघ (एन्फा)को नयाँ नेतृत्वका लागि आगामी चैत १४ गते हुने निर्वाचनमा पूर्वउपाध्यक्ष कर्माछिरिङ शेर्पाले अध्यक्ष पदमा उम्मेदवारी घोषणा गरेका छन् ।

शनिबार काठमाडौंमा पत्रकार सम्मेलन गर्दै विभिन्न जिल्ला संघ, ‘ए’, ‘बी’, ‘सी’ डिभिजन क्लबका प्रतिनिधि तथा फुटबलका अरु सरोकारवाला व्यक्तिको बाक्लो उपस्थितिकाबीच शेर्पाले उम्मेदवारी घोषणा गरेका हुन् ।

फिफाले भ्रष्टाचार मामलामा मुछिएको भन्दै तत्कालीन अध्यक्ष गणेश थापालाई १० वर्षको प्रतिबन्ध लगाएसँगै एक वर्षे कार्यकालका लागि रिक्त रहेको अध्यक्ष पदमा १५ महिनाअघि भएको निर्वाचनमा शेर्पा नरेन्द्र श्रेष्ठसँग पराजित भएका थिए ।

तर, त्यतिबेला गणेश थापानिकट मानिएका श्रेष्ठलाई अध्यक्षमा जिताउन लागिपरेका एन्फाका मानार्थ अध्यक्ष टासी घले, पूर्वराष्ट्रिय खेलाडी विज्ञानराज शर्मा, उपाध्यक्ष वीरबहादुर खड्का, पूर्वसीइओ इन्द्रमान तुलाधरलगायतले योपटक शेर्पालाई समर्थन गरेका छन् ।

पत्रकार सम्मेलनमा अध्यक्ष पदका उम्मेदवार शेर्पाले फुटबलमा देखिएको विकृतिविरुद्ध तथा परिवर्तनका लागि लामो समयदेखि गर्दै आएको आन्दोलनलाई सबै एकजुट भएर गन्तव्यमा पुर्‍याउन आफूले उम्मेदवारी घोषणा गरेको बताए ।