थरिथरिका तीजगीत

काठमाडौं, भदौ २२ । हिन्दु नारीहरुको महान् चाड तीज र गीत–संगीतबीच अन्योन्याश्रित सम्बन्ध छ ।

तीज नजिकिएसँगै तीजका भाका घन्किन थाल्छन् । कतिपय कलाकारले त तीजलाई ध्यानमा राखेर नै नयाँ–नयाँ गीत र एल्बम सार्वजनिक गर्ने गरेका छन् ।

महिला दिदी–बहिनीले तीजमा दुःख–सुखका भावना व्यक्त गर्न गीत–संगीतलाई माध्यम बनाउने गरेको पुरानै प्रचलन हो ।

अझ विशेष गरेर विवाहित महिलाले माइतीघर छाडेर जानु पर्दाको पीडा र विवाहित घरका अप्ठ्याराहरु गीतमा व्यक्त गर्दछन् ।

प्रविधिको विकाससँगै विगत केही वर्षयता तीज नजिकिँदै जाँदा रेडियो, टेलिभिजन र सामाजिक सन्जालमा घन्कने गीतले सहर–बजार तातिने गरेको छ ।

विरहका भाका हुन् वा हर्ष–उल्लासका ती गीत घन्किनेबित्तिकै तीज नजिकियो भन्ने महसुस सबैलाई हुन्छ ।

घर–आँगनमा आइपुगेको तीजको झ–झल्को दिलाउने यस्ता गीतले पक्कै पनि दिदी–बहिनीहरुलाई माइती जाने रहर जगाउँछ नै ।

यसैले त स्वदेशमामात्र होइन, विदेशमा रहेका नेपालीहरु पनि तीज नजिकिएसँगै गीत–संगीतमा रमाउने गरेकाले त्यस्तै भाकाका गीत पनि बजारमा निस्कन थालेका छन् ।

तीजको अवसरमा हरेक वर्ष बजारमा तीजगीत सार्वजनिक गर्ने कलाकारहरुले आफ्नो पेसासँग सम्बन्धित गीत पनि बजारमा भित्र्याएका छन् ।

तीजलाई नै अवसर पारेर समाजमा देखिएका विकृति र विसंगति समेटिएका गीत पनि केही वर्षयता बजारमा आउन थालेका छन् ।

तर, संस्कृति वा चाडपर्वका लागि बनाइने गीत अन्य व्यावसायिकजस्ता हुन नहुने तर्क पनि कतिपयको छ ।

तीजकै लागि भनेर सार्वजनिक गरिएका केही गीत यस्ता पनि छन्, जुन परिवारसँग बसेर हेर्न त्यति उपयुक्त लाग्दैनन् ।

चाडपर्वले संस्कृतिको जर्गेना गर्नुपर्नेमा यस्ता गीतले समाजमा उल्टै विकृति फैलाउनेमा कुनै शंका छैन ।

त्यसैले तीजमा गाइने खुसी र विरहका गीतहरुमै ध्यान दिनसके गीत–संगीत र चाडपर्व जीवन्त बन्नसक्छन् ।