डुंगा दुर्घटनामा ४० जनाको मृत्यु, कयौं बेपत्ता

तान्जानिया, असोज ५ । तान्जानियाको भिक्टोरिया तालमा डुंगा दुर्घटना हुँदा कम्तिमा ४० जनाको मृत्यु भएको छ ।

एक सरकारी अधिकारीलाई उद्धृत गर्दै रोयटर्स समाचार संस्थाले जनाएअनुसार दुर्घटनामा २ सय भन्दा बढी व्यक्ति डुबेको आशंका गरिएको छ । सय जनाको जीवितै उद्धार गरिएको छ । तीमध्ये ३२ जनाको अवस्था चिन्ताजनक छ ।

सो डुंगामा चार सय यात्रु सवार रहेको बताइएको छ । घटनामा कति व्यक्तिको हताहति भयो भन्नेबारे यकिन जानकारी अहिलेसम्म प्राप्त भएको छैन ।

एमबी न्येरेरे नाम दिइएको उक्त डुंगा उकोरा र बगोलोरा द्वीप नजिकै दुर्घटनामा परेको हो । डुंगामा क्षमताभन्दा बढी यात्रु रहेको र तिनीहरु एकै दिशामा ढल्कँदा दुर्घटना भएको जनाइएको छ ।

उद्धार कार्य हालका लागि स्थगित गरिएको छ । सन् १९९६ मा भिक्टोरिया तालमा डुंगा दुर्घटना हुँदा ८ सय व्यक्तिको मृत्यु भएको थियो । यसलाई पछिल्लो शताब्दीको सबैभन्दा खराब डुंगा दुर्घटनाको संज्ञा दिइने गरिन्छ । (एजेन्सी)