भारतमा चुनावी घमसान, बिहारमा विपक्षीको महागठबन्धन

नयाँ दिल्ली (बीबीसी) । भारतको सत्तारुढ भारतीय जनता पार्टीले लोकसभा चुनावका लागि आफ्ना उम्मेदवारको पहिलो सूची सार्वजनिक गरेको छ । भारतमा लोकसभाको चुनाव आउँदो एप्रिल ११ मा शुरू भई मे १९ मा सकिनेछ ।

बिहीवार अबेर राति बीजेपीका वरिष्ठ नेता, केन्द्रीय मन्त्री र पार्टीको केन्द्रीय चुनाव समितिका सचिव जेपी नड्डाले १८४ जना उम्मेदवारबारे टुंगो लगाएका हुन् । सूची सार्वजनिक गरिनुअघि बीजेपीका कैयौँ ठूला नेता त्यसमा नसमेटिने अड्कलबाजीहरू भइरहेका थिए ।

तर जेपी नड्डाले उम्मेदवारहरूको घोषणा गर्न थालेपछि पार्टी अध्यक्षको नाम आउँदा धेरैजना आश्चर्यमा परे । अध्यक्ष अमित शाह गान्धीनगरबाट चुनाव लड्नेछन् ।

बीजेपीका वरिष्ठ नेता लालकृष्ण आडवाणी गान्धीनगरबाट निर्वा्चित वर्तमान सांसद हुन् । शाह राज्यसभाका सदस्य हुन् र पहिलो पटक उनी लोकसभाका लागि उठ्दैछन् ।

उम्मेदवारहरूको सूचीमा आडवाणीको नाम छैन । नड्डाले त्यसबारे केही भनेनन्, तर आडवाणीलाई बीजेपीले पाखा लगाएको बुझ्न सकिन्छ । वरिष्ठ नेता आडवाणीलाई नसमेटिएकोमा त्यसप्रति असन्तुष्टियुक्त एउटा ट्वीट विपक्षी कांग्रेस आईका प्रवक्ता रणदीप सिंह सुरजेवालाले गरेका छन् ।

बीजेपीले उत्तर प्रदेशको कुल ८० सीटमध्ये अहिलेलाई २८ मा उम्मेदवार घोषणा गरेको छ । जसअनुसार बहालवाला छ जना सांसदलाई सूचीमा समेटिएको छैन । त्यसमा वरिष्ठ नेता तथा पूर्वअध्यक्ष मुरली मनोहर जोशीको पनि नाम छैन।

यसको अर्थ उनलाई पनि पाखा लगाइएको छ । प्रधानमन्त्री नरेन्द्र मोदीले फेरि पनि वाराणसीबाट प्रतिस्पर्धा गर्ने भएका छन् । मोदीविरुद्ध भीम आर्मीका संस्थापक चन्द्रशेखर आजादले चुनावी प्रतिस्पर्धामा उत्रिने बताएका छन् ।

उनले कांग्रेस आई र अरू पार्टीहरूलाई पनि समर्थनका निम्ति आह्वान गर्ने बताएका छन् । हालै कांग्रेस आईकी महासचिव सोनिया गान्धीले आजादसँग भेटघाट गरेकी थिइन् र सो क्रममा उम्मेदवारीबारे पनि कुराकानी भएको थियो ।

गृहमन्त्री राजनाथ सिंह लखनऊबाट, स्मृति ईरानी अमेठीबाट र विदेश राज्यमन्त्री जनरल वीके सिंह गाजियाबादबाट चुनावमा उठ्नेछन् । स्मृति ईरानीको सामना कांग्रेस आईका अध्यक्ष राहुल गान्धीसँग हुनेछ ।

हेमा मालिनी मथुराबाटै उठ्नेछिन् । केन्द्रीय संस्कृतिमन्त्री महेश शर्मालाई नोएडाबाटै उठाइएको छ । अर्का केन्द्रीय मन्त्री नितिन गडकरी नागपुरबाटै उठ्नेछन् ।

जानकारहरूका अनुसार यसपटक सीटको बाँडफाँट विधानसभा चुनावको परिणामलाई ध्यानमा राखेर गरिएको छ । त्यस्तै नेताहरूको कामलाई पनि हेरिएको बताइएको छ ।

यसबैची शुक्रबार बिहारमा विपक्षीहरुको महागठबन्धनको सीट बाँडफाड सार्वजनिक गरिएको छ । काँग्रेस, आरएलएसपी, हम, भीआईपी र राष्ट्रिय जनता दल (आरजेडी)बीच बिहारमा महागठबन्धन भएको हो ।

गठबन्धनअनुसार बिहारमा आरजेडी २० सीट, काँग्रेस ९, आरएलएसपी ५, हम ३ र भीआईपी ३ सीटमा चुनाव लड्नेछन् । बिहारमा सत्तारुढ गठबन्धन एनडीए र विपक्षीको महागठबन्धनबीच कडा प्रतिस्पर्धा हुने देखिएको छ ।