जम्मू बम विष्फोटमा हिजबुलको हात रहेको दावी, शंकास्पद आक्रमणकारी पक्राउ

एजेन्सी । भारत प्रशासित जम्मूमा बिहीबार भएको बम विष्फोटमा कश्मीरको पृथकतावादी संगठन हिजबुल मुजाहीद्दिनको हात रहेको भारतीय सञ्चारमाध्यमहरुले बताएका छन् ।

जम्मूको एक बस पार्कमा बिहीबार बम विष्फोट गराइएको थियो । सो घटनामा एकजना सर्वसाधरणको मृत्यु भएकोसमेत बताइएको छ ।

जम्मू कश्मीर प्रहरीले यो आक्रमणमा हिजबुल मुजाहीद्दिनको हात रहेको बताएको छ । ग्रेनेड फाल्ने चरमपन्थी पक्राउ परेकोसमेत प्रहरीले जनाएको छ ।

पक्राउ परेका व्यक्तिको नाम आसिर जावेद भट्ट हो । एक प्रत्यक्षदर्शीले भने, जुन समय विष्फोट भयो, मलाई लाग्यो टायर फुट्यो । यो निकै ठूलो विष्फोट थियो ।’

जम्मू कश्मीर प्रहरीका आईजीपी एमके सिन्हाले ग्रेनेड बसको तल खसेको बताए । उनले यो ग्रेनेड आक्रमण स्टेट ट्रान्सपोर्ट कर्पोेरेशन (एसआरटीसी) को बसमा भएको बताए ।

विष्फोटमा परी बस पूर्ण क्षतिग्रस्त भएको छ । बसका ड्राइभर र सहयोगी घाइते भएका छन् । मे २०१८ देखि हालसम्म बस पार्कमा भएको यो तेस्रो आक्रमण हो ।

प्रहरीकाअनुसार आक्रमणकारीको पहिचानका लागि सीसीटीभी फूटेज जाँच गरिँदैछ । जहाँ विष्फोट भयो सो जम्मूको एक व्यस्थ बस पार्क हो ।

बिहीबार बिहानै सर्च अप्रेशनमा हंदवाडामा एक आतंकवादीको दोहोरो भीडन्तमा मृत्यु भएकोसमेत प्रहरीले दावी गरेको छ । हंदवाडा र कुपवाडामा इन्टरनेट बन्द गरिएको छ ।

यो क्षेत्रमा मंगलबार पनि सुरक्षाकर्मी र कतिथ आतंकवादीबीच भीडन्त भएको भारतीय सञ्चारमाध्यमहरुले जनाएका छन् ।

सो भीडन्तमा दुईजना आतंकवादी मारिएको प्रहरीले दावी गरेको छ । यी दुबै हिजबल मुजाहीद्दिन संगठनका सदस्य रहेको बताइएको छ ।