तरकारी बेच्न गएकी महिलाको लेक लागेर मृत्यु

लमजुङ — मनाङमा तरकारी बेच्न गएकी एक महिलाको लेक लागेर निधन भएको छ ।धादिङ घर भई लमजुङको मर्स्याङ्दी गाउँपालिका ४ स्याँगेमा बस्दै आएकी अन्दाजी ४६ वर्षीया सुकमाया तामाङको निधन भएको प्रहरीले जनाएको छ । मनाङ ङिस्याङ गाउँपालिका १ पिसाङमा तरकारी बेच्न पुगेकी तामाङ अचानक बेहोस् भएपछि स्थानीयले पिसाङ स्वास्थ्य चौकीमा लगेका थिए ।
स्वास्थ्य चौकीबाट लमजुङ जिल्ला सामुदायिक अस्पताल बेंसीसहर रिफर गरिएको र उपचारको क्रममा निधन भएको मनाङका डीएसपी खड्कबहादुर खत्रीले बताए। उनका अनुसार तामाङ बुधबार दिउँसो पौने ३ बजेतिर बेहोस् भएकी थिइन्। अस्पतालमा राति साढे ८ बजेतिर उनको निधन भएको प्रहरीले बताएको छ।

३ हजार २ सय ६० मिटरमा रहेको उक्त ठाउँ उचाईमा रहेकाले लेक लागेर निधन भएको हुन सक्ने प्रहरीले बताएको छ। स्थानीयका अनुसार उनको मुखबाट रगत बगेर शरीर कालो भएको थियो। उनी यसअघि पनि तरकारी बेच्न गएकी थिइन्। लेक लागेर, रक्सी सेवन वा हृदयघातका कारण उनको निधन भएको हुन सक्ने स्थानीयले बताएका छन्।