तीर्थयात्री चढेकाे बस दुर्घटनामा एकजनाको मृत्यु, एकै परिवारका १४ घाइते

प्रकाशित मिति : शनिबार, जेष्ठ १८, २०७६

धनकुटा — भारतको दरभङ्गामा शुक्रबार तीर्थयात्रीको बस दुर्घटना हुदाँ एकजनाको मृत्यु भएको छ । एकै परिवारका १४ जना घाइते भएका छन् ।

मृत्यु हुनेमा धनकुटा नगरपालिका ३ आत्माराका ६८ वर्षीय नारायण घिमिरे रहेको प्रहरीले जनाएको छ।

तीर्थयात्राको त्रममा रहेको बस दुर्घटना हुँदा त्यसमा सवार एउटै परिवारका सदस्य घाइते भएका हुन्। घाइते अधिकांशको अवस्था गम्भीर रहेको छ।

घाइते हुनेमा मृतक घिमिरेकी श्रीमती रुक्मिणी सहित गोपाल भण्डारी, सीता भण्डारी, नारायण भण्डारी, कुवेर भण्डारी, गायत्री भण्डारी, खेम भण्डारी, विमला भण्डारी, भोला भण्डारी, मेनुका भण्डारी, अम्बिका अधिकारी, गायत्री दाहाल, कमला दाहाल लगायत रहेका छन्।

मृतक घिमिरेको घटनास्थलमा नै मृत्यु भएको पारिवारिक स्रोतले जनाएको छ। घिमिरे धनकुटा बचत तथा ऋण सहकारी संस्थाका व्यावस्थापक समेत रहेका थिए। घाइते सबैको विराटनगरस्थित विराट मेडिकल कलेजमा उपचार भइरहेको छ।