धोबीघाटमा स्कोरपियो, पिकअप भ्यान र मोटरसाइकल जुध्यो, २ को मृत्यु

ललितपुर महानगरपालिका -३ धोबीघाटस्थित नयाँ बाटो रिङरोडमा स्कोरपियो, पिकअप भ्यान र मोटरसाइकल एकआपसमा ठोक्किँदा दुई जनाको मृत्यु भएको छ।

एकान्तकुनाबाट बल्खुतर्फ आउँदै गरेको बा १६ च ४७४३ स्कोरपियो गाडीले बल्खुबाट एकान्तकुनातर्फ जाँदै गरेको बा ११ च ८९४९ बोलेरो गाडी, बा १२ च ५७७६ नम्बरको महेन्द्रा पिकअप भ्यान र बा ४३ प ९८६३ नम्बरको पल्सर मोटरसाइकललाई आइतबार अपरान्ह ठक्कर दिएको हो।

दुर्घटनामा गम्भीर घाइते भएका मोटरसाइकल चालक र सवार यात्रुलाई उपचारका लागि नर्भिक अस्पताल लगे पनि अस्पतालले मृत घोषणा गरिसकेको ललितपुर प्रहरीका डिएसपी नारायण चिमोरियाले सेतोपाटीलाई बताए।

दुर्घटनामा परी नुवाकोट घर भई काठमाडौं कलंकी बस्दै आएका मोटरसाइकल चालक २८ वर्षीय चन्द्रमणि मुडवडी र मोटरसाइकलको पछाडि बसेका ललितपुर गोदावरीका ४० वर्षीय गोविन्द शर्माको मृत्यु भएको हो। उनीहरू पेशाले पत्रकार हुन्।

ठक्कर दिने सवारी चालकलाई प्रहरीले नियन्त्रणमा राखिएको चिमोरियाले बताए।